മാലിന്യം വലിച്ചെറിഞ്ഞാല്‍ കര്‍ശന നടപടി: മുന്നറിയിപ്പുമായി അബുദാബി

വാഹനങ്ങളില്‍ നിന്ന് റോഡുകളിലും മറ്റും മാലിന്യം വലിച്ചെറിയുന്നവര്‍ക്കെതിരെ കര്‍ശന നടപടി സ്വീകരിക്കുമെന്ന് അബുദാബി. പിടിയിലാകുന്നവര്‍ പാത വൃത്തിയാക്കുകയോ 1,000 ദിര്‍ഹം വരെ പിഴയടയ്ക്കുകയോ ചെയ്യണമെന്ന് അധികൃതര്‍ വ്യക്തമാക്കി. ഇത്തരക്കാരെ പിടികൂടാന്‍ നിരീക്ഷണം കര്‍ശനമാക്കി. ഓടുന്ന വാഹനങ്ങളില്‍ നിന്നു സിഗരറ്റ് കുറ്റികളും ഭക്ഷണാവശിഷ്ടങ്ങളും മറ്റും വലിച്ചെറിയുന്നത് ശ്രദ്ധയിപ്പെട്ടതിനെ തുടര്‍ന്നാണ് അധികൃതരുടെ നടപടി. യാത്രക്കാര്‍ മാലിന്യം വലിച്ചെറിയുന്നത് തടഞ്ഞില്ലെങ്കില്‍ ഡ്രൈവര്‍മാര്‍ക്കെതിരെയും നടപടി സ്വീകരിക്കും. ലൈസന്‍സില്‍ 6 ബ്ലാക് പോയിന്റ് പതിക്കുന്നത് ഉള്‍പ്പെടെയുള്ള നടപടികള്‍ സ്വീകരിക്കും. വാഹനങ്ങളില്‍ നിന്ന് മാലിന്യം പുറത്തെറിയുന്ന വിഡിയോ സഹിതം പങ്കുവച്ചാണ് പൊലീസ് താക്കീത് നല്‍കിയിരിക്കുന്നത്. ഇത്തരം കേസുകളിലായി 2019 ല്‍ 355 പേരെ പിടികൂടിയിരുന്നതായി ഗതാഗത വകുപ്പ് മേധാവി അറിയിച്ചു. മാലിന്യം നിക്ഷേപിക്കാന്‍ വിവിധയിടങ്ങളില്‍ സംവിധാനം ഏര്‍പ്പെടുത്തിയിട്ടുണ്ട്. ഇത് ഉപയോഗിക്കണമെന്നും പൊതുജനങ്ങള്‍ക്ക് നിര്‍ദ്ദേശം നല്‍കി.