പുനര്‍ ജനിക്കുന്നു കമ്യൂണിസം

കണ്ണൂര്‍: നീതിയുടെ പക്ഷത്ത് ഉറച്ചുനിന്നതിന് ജീവത്യാഗം ചെയ്യേണ്ടിവന്നവര്‍ കമ്യൂണിസ്റ്റുകാര്‍ എന്ന വിലയിരുത്തലാകും ഏറെ ഉചിതം. കയ്യൂരും കരിവെള്ളൂരും കാവുമ്പായിയും പാടിക്കുന്നും മുനയന്‍കുന്നും തില്ലങ്കേരിയും പഴശ്ശിയും സേലം ജയിലിലെ വെടിവയ്പും പുന്നപ്രയും വയലാറും ഉള്‍പ്പെടെയുള്ള രക്തസാക്ഷിത്വങ്ങള്‍ ഇവിടെ പുനര്‍ജനിക്കുമ്പോള്‍, വേട്ടക്കാരുടെ രാഷ്ട്രീയമാണ് തുറന്നുകാട്ടുന്നത്. സാമ്രാജ്യത്വവും ജന്മിത്വവും ഫാസിസ്റ്റ് ഭരണകൂടങ്ങളും വര്‍ഗീയശക്തികളും എക്കാലവും വേട്ടയാടിയത് കമ്യൂണിസ്റ്റുകാരെയാണെന്ന് സിപിഎം പാര്‍ട്ടി കോണ്‍ഗ്രസിന്റെ ഭാഗമായി കണ്ണൂര്‍ കലക്റ്ററേറ്റ് മൈതാനം ഒരുക്കിയ 'ചരിത്രം ഒരു സമരായുധം' പ്രദര്‍ശനം സാക്ഷ്യപ്പെടുത്തുന്നു. 1940 സെപ്തംബര്‍ 15ന് തലശേരി ജവഹര്‍ഘട്ടില്‍ പൊലീസ് വെടിവയ്പില്‍ മരിച്ച മുളിയില്‍ ചാത്തുക്കുട്ടിയും അബു മാസ്റ്ററും മുതല്‍ 2022 ഫെബ്രുവരി 21ന് കോടിയേരി പുന്നോലില്‍ ആര്‍എസ്എസുകാര്‍ അരുംകൊല ചെയ്ത കെ ഹരിദാസന്‍വരെയുള്ള കമ്യൂണിസ്റ്റുകാരുടെ രക്തസാക്ഷിത്വമാണ് ഇവിടെ ആലേഖനം ചെയ്യപ്പെട്ടത്. ശില്‍പ്പങ്ങളും ചിത്രങ്ങളുമായി പോരാട്ടങ്ങളും രക്തസാക്ഷിത്വവും പുതുതലമുറയ്ക്ക് അറിവും ആവേശവുമാകുന്നു. ഇന്ത്യന്‍ നാഷണല്‍ കോണ്‍ഗ്രസിന്റെ ചരിത്രം മലയാളത്തില്‍ ആദ്യമായി എഴുതിയ മൊയാരത്ത് ശങ്കരനെ പൊലീസും കോണ്‍ഗ്രസ് ഗുണ്ടകളും മര്‍ദിച്ചശേഷം ജയിലിലടയ്ക്കുകയും 1948 മെയ് 12ന് മരിക്കുകയും ചെയ്ത സംഭവം കോണ്‍ഗ്രസിന്റെ ക്രൂരത തുറന്നുകാട്ടുന്നു. 1972 സെപ്തംബര്‍ 23ന് തൃശൂര്‍ ചെട്ടിയങ്ങാടിയില്‍ സിപിഎം സംസ്ഥാന സെക്രട്ടറിയറ്റ് അംഗവും ഐക്യമുന്നണി കണ്‍വീനറുമായ അഴീക്കോടന്‍ രാഘവനെ കൊലപ്പെടുത്തിയ വാര്‍ത്തയും ചിത്രവും കാഴ്ചക്കാരെ കണ്ണീരണിയിക്കുന്നു. 1987 മാര്‍ച്ച് 23ന് ചീമേനിയില്‍ അഞ്ച് സഖാക്കളെ ചുട്ടുകൊന്ന കോണ്‍ഗ്രസ് ഭീകരതയും 1994 നവംബര്‍ 25ന് കൂത്തുപറമ്പില്‍ അഞ്ച് യുവാക്കളെ വെടിവച്ചുകൊന്ന പൊലീസ് പൈശാചികതയുമെല്ലാം തുറന്നുകാട്ടുന്ന പ്രദര്‍ശനം, ചരിത്രത്തെ സമരായുധമാക്കണമെന്ന് ആഹ്വാനം ചെയ്യുന്നു.