ചാമ്പിക്കോ ട്രെന്‍ഡ് സെറ്റായി പി.ജയരാജന്‍

കണ്ണൂര്‍ :കണ്ണൂരില്‍ സിപിഎം രാഷ്ട്രീയത്തിലെ തീപ്പൊരി നേതാവാണ് പി.ജയരാജന്‍. പി.ജെ സൈബര്‍ സഖാക്കളുടെ ചങ്കിലെ ചെന്താരകം തന്നെയാണ്. ഇപ്പോള്‍ മാസ് ഹിറ്റായ ഭീഷ്മപര്‍വ്വത്തില്‍ മെഗാസ്റ്റാര്‍ മമ്മൂട്ടി അവതരിപ്പിച്ച സീന്‍ പുനരവതരിപ്പിച്ചിരിക്കുകയാണ് പി.ജയരാജനും യുവ സഖാക്കളും.സൈബര്‍ ഇടങ്ങളിലെ ട്രെന്‍ഡിനൊപ്പം ചേര്‍ന്ന് സിപിഎം നേതാവ് പി.ജയരാജനുമെത്തിയത് അണികള്‍ക്ക് ആവേശമായിട്ടുണ്ട്.ജയരാജന്റെ മകന്‍ ജെയിന്‍ രാജ് ആണ് ഫോട്ടോഷൂട്ടിന്റെ വിഡിയോ 'തലൈവര്‍' എന്ന തലക്കെട്ടോടെ സമൂഹമാധ്യമത്തില്‍ പോസ്റ്റ് ചെയ്തത്. ഇരുപതോളം പാര്‍ട്ടിപ്രവര്‍ത്തകര്‍ക്കൊപ്പമാണ് 'മൈക്കളപ്പന്‍' ആയി ജയരാജന്‍ വിഡിയോയിലെത്തുന്നത്. അമല്‍ നീരദ് -മമ്മൂട്ടി ചിത്രം ഭീഷ്മപര്‍വത്തിലെ ഒരു സീനിന്റെ ചുവട് പിടിച്ച് ഒട്ടേറെ വിഡിയോകള്‍ എത്തിയിരുന്നുവെങ്കിലും അതില്‍ മാസ് വൈറലായത് പി.ജെയുടെത് തന്നെയാണ് കോളെജ്, സ്‌കൂള്‍, ഓഫിസുകള്‍ എവിടെ ഗ്രൂപ്പ് സെല്‍ഫിയുണ്ടോ അവിടെ 'ചാമ്പിക്കോ' ഡയലോഗ് ഉറപ്പാണ്. ഈ ട്രെന്‍ഡിനൊപ്പമാണ് ജയരാജനും ഇപ്പോള്‍ രംഗത്തുവന്നത്. പാര്‍ട്ടി യുവസഖാക്കള്‍ക്കൊപ്പം ഇരുന്ന് മാസായി ഗ്രൂപ്പ് ഫോട്ടോയ്ക്ക് പോസ് ചെയ്യുന്ന ജയരാജന്റെ വീഡിയോയാണ് ഇപ്പോള്‍ വൈറലായിരിക്കുന്നത്. കണ്ണൂരില്‍ ഇരുപത്തിമൂന്നാം പാര്‍ട്ടി കോണ്‍ഗ്രസിന്റെ അനുബന്ധ പരിപാടിയായ ചരിത്ര ചിത്ര-ശില്‍പ്പ - പ്രദര്‍ശനം നടക്കുന്ന വേദിയില്‍ വച്ചാണ് വിഡിയോ ഷൂട്ട് ചെയ്തിട്ടുള്ളത്. സ്റ്റൈലിഷ് ആയ കഥാപാത്രവും സ്ലോ മോഷനും മാസ്മരിക പശ്ചാത്തല സംഗീതവും കൊണ്ട് അമല്‍ നീരദ് സൃഷ്ടിച്ച രംഗം അതേ രീതിയില്‍ റീ ക്രിയേറ്റ് ചെയ്യാനാണ് പലരും മത്സരിക്കുന്നത്. അധ്യാപകര്‍ മുതല്‍ എംഎല്‍എമാര്‍ വരെ 'ചാമ്പിക്കോ' ട്രെന്‍ഡിങ് ഫോട്ടോയിലുണ്ട്.