സന്തോഷത്തിന്റേയും സംതൃപ്തിയുടേയും സൂചികയില്‍ അബുദാബി മുന്നില്‍; സര്‍വേ റിപ്പോര്‍ട്ട്

സന്തോഷത്തിന്റേയും സംതൃപ്തിയുടേയും സൂചികയില്‍ അബുദാബി മുന്നിലെന്ന് സര്‍വേ റിപ്പോര്‍ട്ട്. അന്താരാഷ്ട്ര സന്തോഷ ദിനമായ മാര്‍ച്ച് 20 നാണ് ഫലം പുറത്തുവന്നത്. ജനങ്ങളുടെ ജീവിത നിലവാരത്തിന്റെ പ്രധാന സൂചകങ്ങളിലൊന്നാണ് സന്തോഷത്തിന്റേയും ക്ഷേമത്തിന്റേയും സൂചിക. സന്തോഷത്തിന്റെ സൂചികയില്‍ 7.8 ശതമാനം വര്‍ധനവുണ്ടായിട്ടുണ്ടെന്നാണ് റിപ്പോര്‍ട്ട്. ജീവിത സംതൃപ്തി സൂചികയില്‍ 6.68 ശതമാനം വര്‍ധനവും ഉണ്ടായിട്ടുണ്ട്. താമസ സംതൃപ്തി 67.9 ശതമാനത്തില്‍ നിന്ന് 69.8 ശതമാനമായി വര്‍ധിച്ചു. അതേസമയം നിലവിലെ ഭവന വരുമാന സൂചികയിലെ സംതൃപ്തി 33 ശതമാനത്തില്‍ നിന്ന് 38.5 ശതമാനമായും ഉയര്‍ന്നു. നിലവില്‍ ലോക ഹാപ്പിനസ് റിപ്പോര്‍ട്ട് 2020ന്റെ ഭാഗമായ ഹാപ്പിനസ് ആന്‍ഡ് കംഫര്‍ട്ട് ഇന്‍ഡക്‌സില്‍ അബുദാബി ഒന്നാം സ്ഥാനത്താണ്. സമൂഹത്തിന്റെ ക്ഷേമം ഉറപ്പാക്കുന്നതിനും ഉയര്‍ന്ന നിലവാരമുള്ള ജീവിതം പ്രദാനം ചെയ്യുന്നതിനുമുള്ള യുഎഇയുടെ പ്രവര്‍ത്തനങ്ങളുടെ ശ്രമമാണ് ഈ നേട്ടമെന്നും അബുദാബി കമ്മ്യൂണിറ്റി ഡെവലപ്മെന്റ് ഡിപ്പാര്‍ട്ട്മെന്റ് പറഞ്ഞു. ജനങ്ങളുടെ സംരക്ഷണവും അവരുടെ ജീവിതശൈലി മെച്ചപ്പെടുത്തുന്നതും, മെച്ചപ്പെട്ട ജീവിത നിലവാരവും സന്തോഷം വര്‍ധിക്കുന്നതിന് കാരണമായെന്നും അദ്ദേഹം കൂട്ടിച്ചേര്‍ത്തു.