വിദേശികളുടെ വിസ നിരക്കുകള്‍ കുറച്ച് ഒമാന്‍

ഒമാനില്‍ വിദേശികളുടെ വിസ നിരക്ക് കുറച്ചു. ഒമാന്‍ ഭരണാധികാരി സുല്‍ത്താന്‍ ഹൈതം ബിന്‍ ത്വരിഖിന്റെ നിര്‍ദേശപ്രകാരമാണ് വിസ നിരക്കുകള്‍ കുറച്ചത്. അല്‍ അഹ്ലാം കൊട്ടാരത്തില്‍ മസ്‌കത്ത്, തെക്കന്‍ ബാത്തിന, മുസന്തം എന്നീ ഗവര്‍ണറേറ്റിലെ ശൈഖുമാരുമായി നടത്തിയ കുടിക്കാഴ്ചയിലാണ് ഇത് സംബന്ധമായ നിര്‍ദേശം സുല്‍ത്താന്‍ നല്‍കിയത്. ഇതനുസരിച്ച് പുതുതായി തൊഴില്‍ വിസ എടുക്കുന്നതിനും പുതുക്കുന്നതിനുമുള്ള ഏറ്റവും ഉയര്‍ന്ന നിരക്ക് 301 റിയാലായിരിക്കും. സ്വദേശിവത്കരണ തോത് പൂര്‍ണമായി നടപ്പാക്കുന്ന കമ്പനികള്‍ക്കും സ്ഥാപനങ്ങള്‍ക്കും 85 ശതമാനം വരെ വിസ ഫീസില്‍ ഇളവുണ്ട്. ഈ വര്‍ഷം ജൂണ്‍ ഒന്ന് മുതലാണ് പുതിയ വിസ നിരക്ക് നടപ്പില്‍ വരിക. രണ്ട് വര്‍ഷമാണ് വിസ കാലാവധി. പുതിയ നിരക്കനുസരിച്ച് ഏറ്റവും ഉയര്‍ന്ന വിഭാഗത്തില്‍ ജോലി എടുക്കുന്നവരുടെ വിസ നിരക്ക് 301 റിയാലായിരിക്കും. 74 തസ്തികകളാണ് ഈ വിഭാഗത്തില്‍ വരുന്നത്. സര്‍ക്കാര്‍ നിര്‍ദേശിച്ച സ്വദേശി വത്കരണ തോത് പൂര്‍ണമായി നടപ്പാക്കിയ സ്ഥാപനങ്ങളില്‍ നിന്ന് 211 റിയാലാണ് ഈടാക്കുക. ഇടത്തരം വിഭാഗത്തില്‍ ജോലി ചെയ്യുന്നവരുടെ വിസ നിരക്ക് 251 ആയി കുറച്ചു. സ്പെഷ്യലൈസ്ഡ് വിഭാഗത്തില്‍പെട്ടവരും സാങ്കേതിക മേഖലകളിലും ജോലി ചെയ്യുന്നവരാണ് ഇതില്‍ പെടുന്നത്. കൂടാതെ സ്വദേശിവത്കരണ തോത് പൂര്‍ത്തിയാക്കിയ കമ്പനികളില്‍ നിന്ന് 176 റിയാല്‍ മാത്രമാണ് ഈടാക്കുക.