സൗദിയില്‍ പുരുഷന്മാര്‍ ഷോര്‍ട്ട്സ് ധരിക്കുന്നതിന് വിലക്കില്ല; നിരോധനം സര്‍ക്കാര്‍ ഓഫിസുകളിലും പള്ളികളും മാത്രം

സൗദിയില്‍ പുരുഷന്മാര്‍ ഷോര്‍ട്ട്സ് ധരിക്കുന്നതിന് വിലക്കില്ല. പള്ളികളിലും സര്‍ക്കാര്‍ ഓഫിസുകളിലും മാത്രമാണു ഷോര്‍ട്ട്സിന് വിലക്കുള്ളതെന്ന് അധികൃതര്‍ അറിയിച്ചു. പള്ളികളിലും സര്‍ക്കാര്‍ ഓഫിസുകളിലും ഷോര്‍ട്ട്സ് ധരിച്ചാല്‍ 250 മുതല്‍ 500 റിയാല്‍ വരെ പിഴ ചുമത്തുമെന്ന് കഴിഞ്ഞ ദിവസം സൗദി ആഭ്യന്തര മന്ത്രി അബ്ദുള്‍ അസീസ് ബിന്‍ സഊദ് ബിന്‍ നായിഫ് പറഞ്ഞിരുന്നു. പൊതുസ്ഥലങ്ങളിലെ പെരുമാറ്റച്ചട്ടങ്ങളില്‍ ഇരുപതാമതായി പുതുതായി എഴുതി ചേര്‍ത്തതാണ് ഈ നിയമം. 2019 നവംബര്‍ 2നാണ് പൊതുസ്ഥലങ്ങളിലെ പെരുമാറ്റ ചട്ടം നിലവില്‍ വന്നത്. 50 മുതല്‍ 6000 വരെ റിയാല്‍ പിഴ ലഭിക്കുന്ന നിയമ ലംഘനങ്ങളാണ് ബാക്കിയുള്ള പത്തൊന്‍പതെണ്ണവും. മാന്യമല്ലാത്ത വസ്ത്രം ധരിക്കുക, മറ്റുള്ളവര്‍ക്ക് പ്രയാസമാകും വിധം സംഗീതം ഉച്ചത്തില്‍ വയ്ക്കുക, സ്ത്രീകള്‍ക്ക് മാത്രമായുള്ള സ്ഥലങ്ങളില്‍ പുരുഷന്മാര്‍ പ്രവേശിക്കുക, മറ്റുള്ളവരോട് മോശമായി സംസാരിക്കുക, അപകീര്‍ത്തിപ്പെടുത്തുന്ന രീതിയില്‍ പൊതുസ്ഥലങ്ങളില്‍ എഴുതുക, വരയ്ക്കുക തുടങ്ങിയവയെല്ലാം ശിക്ഷാര്‍ഹമാണ്. പള്ളികളില്‍ വാങ്കോ ഇഖാമത്തോ വിളിക്കുമ്പോള്‍ ഉച്ചത്തില്‍ പാട്ട് വച്ചാല്‍ 1000 റിയാല്‍ പിഴ ചുമത്തും. കുറ്റം ആവര്‍ത്തിച്ചാല്‍ പിഴ രണ്ടായിരമാകും. വാഹനങ്ങളിലും വീടുകളിലും മറ്റും മ്യൂസിക് വയ്ക്കുന്നതിനും ഇത് ബാധകമാണ്.