ദുബായ് മ്യൂസിയം ഓഫ് ദി ഫ്യൂച്ചര്‍ ഈ മാസം 22 ന് തുറന്നുകൊടുക്കും; സന്ദര്‍ശകരെ കാത്തിരിക്കുന്നത് ലോകത്തിന്റെ സാങ്കേതിക ഭാവി മുന്‍കൂട്ടി കാണാനുള്ള അവസരം

ദുബായ് മ്യൂസിയം ഓഫ് ദി ഫ്യൂച്ചര്‍ ഈ മാസം 22 ന് തുറന്നുകൊടുക്കും. ലോകത്തിന്റെ സാങ്കേതിക ഭാവി മുന്‍കൂട്ടി കാണാനും അനുഭവിക്കാനും അവസരമൊരുക്കുന്നതാണ് മ്യൂസിയം. പുറംചുമരുകളില്‍ അറബിക് കാലിഗ്രാഫി ആലേഖനം ചെയ്തതടക്കം ഘടനയിലും നിര്‍മാണത്തിലും ഏറെ പുതുമകളോടെയാണ് മ്യുസിയം ഒരുങ്ങുന്നത്. ഭൂമിയിലെ ഏറ്റവും മനോഹരമായ കെട്ടിടം എന്ന് വിശേഷിപ്പിച്ച് യു.എ.ഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിന്‍ റാഷിദ് അല്‍ മക്തൂമാണ് ട്വിറ്ററിലൂടെ മ്യൂസിയം ഓഫ് ദി ഫ്യൂച്ചര്‍ തുറക്കുന്ന വിവരം പുറത്തുവിട്ടത്. ലോകത്തെ മനോഹരമായ 14 മ്യൂസിയങ്ങളിലൊന്നായി നാഷനല്‍ ജ്യോഗ്രാഫിക് 2021 ല്‍ തെരഞ്ഞെടുത്ത മ്യൂസിയം ഓഫ് ഫ്യൂചര്‍ ദുബായുടെ രാജപാതെയന്നറിയപ്പെടുന്ന ഷെയ്ഖ് സായിദ് റോഡിനരുകിലായാണ് സ്ഥിതി ചെയ്യുന്നത്. വര്‍ത്തമാനകാലത്തിരുന്ന് ഭാവിയുടെ ലോകം നേരില്‍ കണ്ടനുഭവിക്കാനുളള അവസരമാണ് മ്യൂസിയം ഓഫ് ഫ്യൂച്ചര്‍ ഒരുക്കുക. 30,000 ചതുരശ്ര മീറ്ററില്‍ 77 മീറ്റര്‍ ഉയരത്തിലാണ് എഞ്ചിനീയറിങ്ങ് വൈദഗ്ദ്യത്തിന്റെ നേര്‍ക്കാഴ്ച ദുബായ് ഒരുക്കിയിരിക്കുന്നത്. പുറംചുമരുകളില്‍ അറബിക് കാലിഗ്രാഫിയുടെ മനോഹാരിതയും കാണാനാവും. ഭാവിയിലേക്കുള്ള നൂതന ഗവേഷണങ്ങളും പുതിയ സാങ്കേതികവിദ്യകളും അവതരിപ്പിക്കുന്ന വേറിട്ട കേന്ദ്രമായിരിക്കും ഫ്യൂച്ചര്‍ മ്യൂസിയം