‘മലയാളികള്‍ യുഎഇയ്ക്ക് മുതല്‍ക്കൂട്ട്’: മുഖ്യമന്ത്രിക്ക് അബുദാബിയില്‍ ഊഷ്മള സ്വീകരണം

അബുദാബി യുഎഇ സന്ദര്‍ശനത്തിനെത്തിയ മുഖ്യമന്ത്രി പിണറായി വിജയന് അബുദാബിയില്‍ ഊഷ്മള വരവേല്‍പ്പ്. അബുദാബിയിലെ കൊട്ടാരത്തിലെത്തിയ മുഖ്യമന്ത്രിയെ അബുദാബി രാജകുടുംബാംഗവും യുഎഇ ക്യാബിനറ്റ് മന്ത്രിയുമായ ഷെയ്ഖ് നഹ്യാന്‍ ബിന്‍ മുബാറക് അല്‍ നഹ്യാന്‍, ഷെയ്ഖ് നഹ്യാന്റെ മകനും യുഎഇ വിദേശകാര്യ സഹമന്ത്രി ഷെയ്ഖ് ഷഖ്ബൂത്ത് ബിന്‍ നഹ്യാന്‍ അല്‍ നഹ്യാന്‍ എന്നിവര്‍ ചേര്‍ന്ന് സ്വീകരിച്ചു. ഉന്നത ബൗദ്ധിക നിലവാരമുള്ള മലയാളികള്‍ യുഎഇയ്ക്ക് എന്നും മുതല്‍ക്കൂട്ടാണെന്നും പരസ്പര സഹകരണത്തില്‍ ഊന്നിയുള്ള പ്രവര്‍ത്തനങ്ങള്‍ മികച്ച ഭാവി പ്രദാനം ചെയ്യുമെന്നും യുഎഇ മന്ത്രി പറഞ്ഞു. കേരളത്തിലെ നിക്ഷേപ സാഹചര്യങ്ങളെ കുറിച്ച് മുഖ്യമന്ത്രി ഷെയ്ഖ് നഹ്യാന് വിശദീകരിച്ചു. മലയാളികളോട് യുഎഇ ഭരണകൂടം കാണിക്കുന്ന സ്‌നേഹത്തിനും സാഹോദര്യത്തിനും മുഖ്യമന്ത്രി നന്ദി പ്രകടിപ്പിച്ചു. വ്യവസായ മന്ത്രി പി.രാജീവ്, നോര്‍ക്ക വൈസ് ചെയര്‍മാനും അബുദാബി ചേംബര്‍ വൈസ് ചെയര്‍മാനുമായ എം.എ.യുസഫലി, കെഎസ്ഐഡി മാനേജിങ് ഡയറക്ടര്‍ എം.ജി. രാജമാണിക്കം തുടങ്ങിയവരും മുഖ്യമന്ത്രിക്കൊപ്പം ഉണ്ടായിരുന്നു.