വിനോദസഞ്ചാരികളെ സ്വാഗതംചെയ്യല്‍: പട്ടികയില്‍ കേരളം ഒന്നാമത്

തിരുവനന്തപുരം: വിനോദസഞ്ചാരികളെ ഏറ്റവുമധികം സ്വാഗതംചെയ്യുന്ന പ്രദേശമെന്ന ഖ്യാതി നേടി കേരളം. പ്രമുഖ ഡിജിറ്റല്‍ ട്രാവല്‍ പ്ലാറ്റ് ഫോമായ ബുക്കിങ് ഡോട്ട് കോം ആഗോളാടിസ്ഥാനത്തില്‍ നടത്തിയ സര്‍വേയിലാണ് 'മോസ്റ്റ് വെല്‍ക്കമിങ് റീജന്‍' വിഭാഗത്തില്‍ കേരളം ഒന്നാമതെത്തിയത്. വിനോദസഞ്ചാരികളില്‍നിന്നുള്ള 232 ദശലക്ഷത്തിലധികം അവലോകനങ്ങളെ അടിസ്ഥാനമാക്കിയാണ് പട്ടിക തയ്യാറാക്കിയത്. ആതിഥ്യമര്യാദ, സൗഹൃദാന്തരീക്ഷം, കോവിഡ് കാലത്തെ ആരോഗ്യ, ശുചിത്വ പരിപാലനം തുടങ്ങിയ മാനദണ്ഡങ്ങള്‍ കണക്കിലെടുത്താണ് പുരസ്‌കാരം. പത്താമത് വാര്‍ഷിക ട്രാവലര്‍ റിവ്യൂ അവാര്‍ഡാണിത്. ഇന്ത്യയില്‍ സഞ്ചാരികളെ ഏറ്റവുംകൂടുതല്‍ സ്വാഗതം ചെയ്യുന്ന അഞ്ചുപ്രദേശങ്ങളില്‍ മാരാരിക്കുളം, തേക്കടി, വര്‍ക്കല എന്നിവയുള്‍പ്പെടുന്നു. ഗോവയിലെ പാലോലം, അഗോണ്ട എന്നിവയാണ് ആദ്യ രണ്ടുസ്ഥാനങ്ങളില്‍. ഈ അവാര്‍ഡ് ഏറെ പ്രാധാന്യമര്‍ഹിക്കുന്നതാണെന്ന് ടൂറിസം ഡയറക്ടര്‍ വി.ആര്‍. കൃഷ്ണതേജ പറഞ്ഞു.