‘മ്മടെ തൃശൂര്‍ പൂരം’ വെള്ളിയാഴ്ച; ഒരുക്കം പൂര്‍ത്തിയായി

ദുബൈ: 'മ്മടെ തൃശൂര്‍ യു.എ.ഇ' കൂട്ടായ്മയുടെ മൂന്നാം വാര്‍ഷികത്തോടനുബന്ധിച്ച് ഡിസംബര്‍ 17ന് നടത്തുന്ന 'മ്മടെ തൃശൂര്‍ പൂരം 2021'െന്റ ഒരുക്കങ്ങള്‍ പൂര്‍ത്തിയായതായി ഭാരവാഹികള്‍ വാര്‍ത്തസമ്മേളനത്തില്‍ അറിയിച്ചു. നൂറോളം കലാകാരന്‍മാര്‍ അണിനിരക്കുന്ന പരിപാടി രാവിലെ 10 മുതല്‍ രാത്രി 12 വരെ ഇത്തിസലാത്ത് അക്കാദമിയിലാണ് അരങ്ങേറുന്നത്. തേക്കിന്‍കാട് മൈതാനിയിലെ പൂരപ്പറമ്പിനെ അനുസ്മരിപ്പിക്കുന്ന വിധത്തില്‍ പൂരത്തിന്റെ എല്ലാ ഘടകങ്ങളും ഉള്‍ക്കൊള്ളിച്ചാണ് പരിപാടി ഒരുക്കിയിരിക്കുന്നത്. നാട്ടില്‍നിന്ന് പെരുവനം കുട്ടന്‍ മാരാര്‍, കേളത്ത് അരവിന്ദാക്ഷന്‍ മാരാര്‍, പെരുവനം സതീശന്‍ മാരാര്‍, കരിയന്നൂര്‍ സഹോദരങ്ങള്‍ തുടങ്ങിയവര്‍ പരിപാടിക്ക് എത്തുന്നുണ്ട്. ശിങ്കാരി മേളക്കാരും തൃശൂര്‍ കോട്ടപ്പുറം ദേശം പുലികളും വര്‍ണശബളമായ കാവടികളും തയാറായിക്കഴിഞ്ഞു. താലപ്പൊലിയും കേരളത്തിലെ നാടന്‍കലാരൂപങ്ങളും കോര്‍ത്തിണക്കിയ വര്‍ണപ്പകിട്ടേറിയ ഘോഷയാത്രക്കും ഒരുക്കങ്ങള്‍ പൂര്‍ത്തിയായി. എഴുന്നള്ളിപ്പിനും കുടമാറ്റത്തിനുമായി റോബോട്ടിക് ഗജവീരന്‍മാരും തയാറായിട്ടുണ്ട്. തൈക്കുടം ബ്രിഡ്ജിന്റെ കലാപരിപാടികളും അരങ്ങേറും. ഇത്തിസലാത്ത് അക്കാദമി ഗ്രൗണ്ടിനെ പൂരപ്പറമ്പാക്കാനുള്ള എല്ലാ തയാറെടുപ്പുകളും കഴിഞ്ഞെന്ന് 'മ്മടെ തൃശൂര്‍' കൂട്ടായ്മ ഭാരവാഹികളായ പ്രസിഡന്റ് രാജേഷ് മേനോന്‍, സെക്രട്ടറി ശശീന്ദ്രന്‍ മേനോന്‍, ട്രഷറര്‍ സമീര്‍ മുഹമ്മദ് എന്നിവര്‍ അറിയിച്ചു. ഇത്തിസലാത്ത് മെട്രോ സ്‌റ്റേഷനില്‍നിന്നും പൂരപ്പറമ്പിലേക്ക് രാവിലെ പത്തു മുതല്‍ രാത്രി പന്ത്രണ്ടു വരെ ഓരോ മണിക്കൂറിലും സൗജന്യ ഷട്ടില്‍ ബസ് സര്‍വിസും അബൂദബിയില്‍നിന്ന് നാല് സൗജന്യ ബസ് സര്‍വിസുകളും ഉണ്ടാകുന്നതാണെന്നും ഭാരവാഹികള്‍ അറിയിച്ചു. പ്രവേശന പാസിന് www.ticketmagic.me എന്ന വെബ്‌സൈറ്റിലോ 058 6308671, 0505451623, 0506407705 എന്നീ നമ്പറുകളിലോ ബന്ധപ്പെടാം.