എംബിഎസ് പണമെറിഞ്ഞ് വാങ്ങിയ പെയ്ന്റിംഗ് യഥാര്‍ത്ഥത്തില്‍ ഡാവിഞ്ചിയുടേതല്ലെന്ന് റിപ്പോര്‍ട്ട്

സൗദി അറേബ്യ സ്വന്തമാക്കിയ ലോകത്തിലെ ഏറ്റവും വിലപിടിപ്പുള്ള പെയ്ന്റിംഗ് യഥാര്‍ത്ഥത്തില്‍ വിഖ്യാത ചിത്രകാരന്‍ ലിയാനാര്‍ഡൊ ഡാവിഞ്ചി വരച്ചതല്ലെന്ന് റിപ്പോര്‍ട്ട്. സ്‌പെയിനിലെ മുന്‍നിര മൂസിയമായ പ്രാദോ മ്യൂസിയം പുറത്തു വിട്ട പട്ടികയിലാണ് ഇക്കാര്യം വ്യക്തമാക്കുന്നത്. 2017 ല്‍ 450 മില്യണ്‍ ഡോളറിനാണ് ഡാവിഞ്ചിയുടെ സൃഷ്ടിയെന്ന് പറഞ്ഞ salvator Mundi എന്ന പെയ്ന്റിംഗ് ലേലത്തില്‍ വിറ്റു പോയത്. സൗദി കിരീടാവകാശിയായ മുഹമ്മദ് ബിന്‍ സല്‍മാനു വേണ്ടി മറ്റൊരു സൗദി രാജകുമാരനാണ് ഈ പെയ്ന്റിംഗ് വാങ്ങിയതെന്നാണ് അന്ന് പുറത്തു വന്ന റിപ്പോര്‍ട്ട്. ബ്രിട്ടീഷ് ഓക്ഷന്‍ ഹൗസായ ക്രിസ്റ്റീസാണ് അന്ന് ഈ പെയ്ന്റിംഗ് വിറ്റത്. എന്നാല്‍ നാലു വര്‍ഷത്തിനു ശേഷം ഈ കലാസൃഷ്ടിയെ തരം താഴ്ത്തി പട്ടിക പുറത്തു വിട്ടിരിക്കുകയാണ് സ്‌പെയിനിലെ പ്രാദൊ മ്യൂസിയം. ഡാവിഞ്ചിയുടെ സൃഷ്ടികളുടെ എക്‌സിബിഷന്റെ ഭാഗമായാണ് ഇത്തരമൊരു പട്ടിക പുറത്തു വിട്ടത്. ഡാവിഞ്ചിയുടെ ചിത്ര രചനാ രീതികള്‍ വിശകലനം ചെയ്യാനാണ് എക്‌സിബിഷന്‍ ശ്രമിക്കുന്നത്. എക്‌സിബിഷന്റെ കാറ്റ്‌ലോഗില്‍ ഡാവിഞ്ചി തന്നെ വരച്ച ചിത്രങ്ങള്‍, ഡാവിഞ്ചിയുടെ മേല്‍നോട്ടത്തിലുണ്ടായ ചിത്രങ്ങള്‍ എന്നിങ്ങനെ വേര്‍തിരിച്ചിട്ടുണ്ട്. ഇതില്‍ രണ്ടാമത്തെ കോളത്തിലാണ് സൗദി രാജകുമാരന്‍ വാങ്ങിയെന്ന് പറയപ്പെടുന്ന പെയ്ന്റിംഗ് ഉള്ളത്. ഇതിന്റെ യഥാര്‍ത്ഥ പെയ്ന്റിംഗ് നഷ്ടപ്പെട്ടതാണെന്നും സൗദിയുടെ പക്കലുള്ള പെയ്ന്റിംഗ് ഇതുമായി സമാനതയുള്ള പെയ്ന്റിംഗാണെന്നും എക്‌സിബിഷന്‍ അധികൃതര്‍ പറയുന്നു. നാല് വര്‍ഷം മുമ്പ് സൗദി രാജകുമാരനാണ് ഈ പെയ്ന്റിംഗ് വാങ്ങിയതെന്ന് പറയുന്നുണ്ടെങ്കിലും സൗദി ഇക്കാര്യത്തില്‍ ഇതുവരെ പ്രതികരിച്ചിട്ടില്ല. എവിടെയാണ് ഈ പെയ്ന്റിംഗ് ഉള്ളതെന്നും പരമ രഹസ്യമാണ്.