‘കല്‍പറ്റയില്‍ സ്ഥാനാര്‍ഥികളെ ഇറക്കുമതി ചെയ്യരുത്’;

കോണ്‍ഗ്രസ് നേതൃത്വത്തിനെതിരെ വയനാട്ടില്‍ പോസ്റ്റര്‍

കോണ്‍ഗ്രസ് നേതൃത്വത്തിനെതിരെ വയനാട്ടില്‍ പോസ്റ്റര്‍ പ്രത്യക്ഷപ്പെട്ടു. വയനാട് ഡിസിസി യുടെ മുന്നിലും പരിസരപ്രദേശങ്ങളിലും ആണ് പോസ്റ്റര്‍ പ്രത്യക്ഷപ്പെട്ടത്.കല്‍പ്പറ്റ നിയമസഭാമണ്ഡലം സ്ഥാനാര്‍ഥികളെ ഇറക്കുമതി ചെയ്യുന്ന രീതി നേതൃത്വം ഒഴിവാക്കണമെന്നാണ് പോസ്റ്ററിലെ ഉള്ളടക്കം. നേതൃത്വം സ്ഥാനാര്‍ഥികളെ ഇറക്കുമതി ചെയ്താല്‍ ഡിസിസി പിരിച്ചുവിടണമെന്നും പോസ്റ്ററില്‍ ഉണ്ട്. ഇന്ന് പുലര്‍ച്ചെയാണ് പോസ്റ്റര്‍ പ്രത്യക്ഷപ്പെട്ടത്.
അതേസമയം, ഉമ്മന്‍ചാണ്ടി അധ്യക്ഷനായുള്ള പത്തംഗ കോണ്‍ഗ്രസ് തെരഞ്ഞെടുപ്പ് സമിതി ഇന്ന് യോഗം ചേരുകയാണ്. കെപിസിസി ആസ്ഥാനത്താണ് യോഗം. ഇതുവരെയുളള ഉഭയകക്ഷി ചര്‍ച്ചകള്‍ യോഗം വിലയിരുത്തും. സ്ഥാനാര്‍ത്ഥി നിര്‍ണയത്തില്‍ പ്രാഥമിക ഘട്ട ചര്‍ച്ചകളും യോഗത്തില്‍ ഉണ്ടാവും.
സിറ്റിംഗ് എംഎല്‍എമാര്‍ക്ക് സീറ്റ് നല്‍കാന്‍ ഇതിനകം തന്നെ ധാരണയായിട്ടുണ്ട്. മറ്റ് സീറ്റുകളില്‍ ആരൊക്കെ എന്നതിനേ സംബന്ധിച്ചുള്ള ചര്‍ച്ചകളാണ് തുടങ്ങുന്നത്. സിറ്റിംഗ് എംഎല്‍എമാര്‍ക്ക് ആര്‍ക്കെങ്കിലും മണ്ഡലം മാറണോ എന്നും യോഗം പരിശോധിക്കും. കെസി ജോസഫ് ഇരിക്കൂര്‍ മാറണം എന്ന് വ്യക്തമാക്കിയ സാഹചര്യത്തില്‍ പകരം സീറ്റ് എവിടെ നല്‍കും എന്നതും ചര്‍ച്ചയാകും. തൊണ്ണൂറ്റി അഞ്ച് സീറ്റുകളില്‍ കോണ്‍ഗ്രസ് മത്സരിക്കും എന്നാണ് നിലവിലെ വിലയിരുത്തല്‍.