കൊച്ചി പിടിക്കാൻ ശ്രീധരൻ , ബി ജെ പി നീക്കങ്ങൾ തുടങ്ങി

കൊച്ചി നഗരത്തിൽ ചുവട് ഉറപ്പിക്കാൻ മെട്രോമാൻ ഇ ശ്രീധരനെ രഗത്ത് ഇറക്കാൻ ബിജെ പി നീക്കം. കേരളം അംഗീകരിക്കുന്ന ശ്രീധരൻ കൊച്ചിയിൽ തന്നെ അങ്കം കുറിച്ചാൽ നിഷ്പക്ഷ വോട്ടുകൾ പാർട്ടിയിലേക്ക് എത്തുമെന്നാണ് വിലയിരുത്തൽ.
എന്നാൽ ഇക്കാര്യത്തിൽ അന്തിമ തീരുമാനം കേന്ദ്രനേതൃത്വത്തിന്റേതാണ്. നിയമസഭയിൽ കാലിടറിയാലും കേന്ദ്രത്തിൽ ഉന്നത പദവിയാണ് വാഗ്ദാനം . എന്തായാലും താൻ ബി ജെ പി യിലേക്കാണന്ന് ശ്രീധരൻ വ്യക്തമാക്കി കഴിഞ്ഞു.
മെട്രോമാൻ ഇ ശ്രീധരൻ ബി ജെ പിയിൽ ചേരുമെന്ന് ബി ജെ പി സംസ്ഥാന അദ്ധ്യക്ഷൻ കെ സുരേന്ദ്രൻ. വിജയയാത്രവേളയിലാകും ഇ ശ്രീധരൻ പാർട്ടിയിൽ ചേരുക. വരും ദിവസങ്ങളിൽ കൂടുതൽ പേർ പാർട്ടിയിലേക്ക് എത്തുമെന്നും സുരേന്ദ്രൻ വ്യക്തമാക്കി. നിയമസഭാ തിരഞ്ഞെടുപ്പിൽ മത്സരിക്കണമെന്ന ആവശ്യം ഇ ശ്രീധരനെ അറിയിച്ചിട്ടുണ്ടെന്നും സുരേന്ദ്രൻ പറഞ്ഞു.

കേരളത്തിന് നീതി ഉറപ്പാക്കാൻ ബി ജെ പി വരണമെന്ന് ഇ ശ്രീധരൻ പ്രതികരിച്ചു. ഒമ്പത് വർഷത്തെ രാഷ്ട്രീയ പ്രവേശനത്തിന്റെ വെളിച്ചത്തിലാണ് ബി ജെ പിയിൽ ചേരുന്നത്. പാർട്ടി പറഞ്ഞാൽ തിരഞ്ഞെടുപ്പിൽ മത്സരിക്കുമെന്നും ഇ ശ്രീധരൻ പറഞ്ഞു.

ചലച്ചിത്ര താരങ്ങളടക്കം പ്രമുഖരുമായി ബി ജെ പി ചർച്ച നടത്തിവരികയാണ്. കേന്ദ്ര നിർദ്ദേശ പ്രകാരമാണ് കൂടിക്കാഴ്ചകൾ നടക്കുന്നത്. പാർട്ടിയുമായി പിണങ്ങി നിൽക്കുന്ന മേജർ രവിയെ തിരികെ ബി ജെ പി പാളയത്തിലേക്ക് എത്തിക്കാനുളള ശ്രമങ്ങളും നടക്കുന്നുണ്ട്.

രമേശ് പിഷാരടി, ധർമ്മജൻ, ഇടവേള ബാബു തുടങ്ങിയവർ രമേശ് ചെന്നിത്തല നയിക്കുന്ന ഐശ്വര്യ കേരളയാത്രയുടെ വേദിയിലെത്തിയത് വലിയ വാർത്തയായിരുന്നു. ഇതിനു തൊട്ടുപിന്നാലെയാണ് ബി ജെ പിയുടെയും രാഷ്ട്രീയ നീക്കം.