പിണറായിക്കെതിരെ ഷമ വരുന്നു

മുഖ്യമന്ത്രി പിണറായി വിജയനെതിരെ കണ്ണൂർ ധർമടത്തു മത്സരിക്കാൻ തയാറാണെന്ന് എഐസിസി വക്താവ് ഡോ. ഷമ മുഹമ്മദ്ം വ്യക്തമാക്കി. മുപ്പത്തയ്യായിരത്തിലേറെ വോട്ടുകൾക്ക് പിണറായി വിജയൻ മൽസരിച്ച് വിജയിച്ച് നിൽക്കുന്ന മണ്ഡലത്തിൽ മൽസരിക്കുമോ എന്ന ചോദ്യത്തിനായിരുന്നു മറുപടി.

മുതിർന്ന നേതാക്കൾ തയാറാകണമെന്ന് കെപിസിസി നിർവാഹക സമിതി അംഗം മമ്പറം ദിവാകരൻ. ആവശ്യപ്പൊതിനു പിന്നാലെയാണ് ഷമയുടെ രംഗ പ്രവേശം. ധർമടം നിയോജക മണ്ഡലം സിപിഎമ്മിന് സ്വാധീനമുള്ള പ്രദേശമാണ്. ഇത്തവണയും എൽഡിഎഫ് സ്ഥാനാർഥി പിണറായി വിജയൻ തന്നെയാകാനാണ് സാധ്യത. കഴിഞ്ഞ രണ്ടു തവണയും ധർമടത്തുനിന്ന് പരാജയപ്പെട്ട മമ്പറം ദിവാകരൻറെ പേരു തന്നെയാണ് യുഡിഎഫ് ക്യാംപിൽ ഉയർന്നുകേൾക്കുന്നത്. മണ്ഡലത്തിൽ യുഡിഎഫിൻറെ സംഘടന സംവിധാനം ശക്തമാണെന്നും മുതിർന്ന നേതാക്കളാരെങ്കിലും മത്സരിച്ചാൽ മാത്രമാണ് ഫലമുണ്ടാകുമെന്ന് മമ്പറം ദിവാകരൻ പറയുന്നു.

തുടർഭരണം ലക്ഷ്യമിട്ട് മൽസരിക്കാനിറങ്ങുന്ന പിണറായി വിജയനെ നേരിടാൻ ശക്തരെ തന്നെ രംഗത്തിറക്കാൻ കോൺഗ്രസ് തീരുമാനിച്ചാൽ ഷമയ്ക്ക് നറുക്കുവീഴും.
മണ്ഡലത്തിൽ ഷമയെ തുണയ്ക്കുന്നത് മറ്റ് ചില ഘടകങ്ങളാണ്.

കോൺഗ്രസിൻറെ ദേശീയ വക്താക്കളിലൊരാൾ, ദേശീയ മാധ്യമങ്ങളിലെ നിറസാന്നിധ്യം. തദ്ദേശ തിരഞ്ഞെടുപ്പിൽ, ധർമടത്തിൻറെ ഭാഗമായ കടമ്പൂർ പഞ്ചായത്ത് എൽഡിഎഫിൽ നിന്ന് പിടിച്ചെടുത്തതടക്കമുള്ള നേട്ടങ്ങളാണ് യുഡിഎഫിൻറെ ആത്മവിശ്വാസം. എന്നാൽ ശക്തികേന്ദ്രത്തിൽ വിജയം ഉറപ്പെന്ന് എൽഡിഎഫ് നേതാക്കൾ പറയുന്നു.