ബംഗളൂരു മയക്കുമരുന്ന് കേസില്‍ കന്നട സിനിമ മേഖലയുമായി ബന്ധപ്പെട്ട ആദിത്യ ആല്‍വ അറസ്റ്റില്‍

ബംഗളൂരു: ബംഗളൂരു മയക്കുമരുന്ന് കേസില്‍ ആറാം പ്രതി ആദിത്യ ആല്‍വ (31) അറസ്റ്റില്‍. കന്നട സിനിമ മേഖലയുമായി ബന്ധപ്പെട്ട മയക്കുമരുന്ന് കേസിലാണ് ആറാം പ്രതി ആദിത്യ ആല്‍വ (31)യെ അറസ്റ്റില്‍. അന്തരിച്ച കര്‍ണാടക ജെ.ഡി-എസ് മുന്‍ മന്ത്രി ജീവരാജ് ആല്‍വയുടെ മകനും ബോളിവുഡ് നടന്‍ വിവേക് ഒബ്‌റോയിയുടെ ഭാര്യാസഹോദരനുമാണ് ആദിത്യ. കേസിലുള്‍പ്പെട്ടതോടെ ഒളിവില്‍പോയ ഇയാളെ രഹസ്യവിവരത്തെ തുടര്‍ന്ന് തിങ്കളാഴ്ച രാത്രി ചെന്നൈയില്‍നിന്നാണ് സെന്‍ട്രല്‍ ക്രൈംബ്രാഞ്ച് (സി.സി.ബി) അറസ്റ്റ് ചെയ്തത്.

ബംഗളൂരുവിലെത്തിച്ച പ്രതിയെ ചാമരാജ് പേട്ടിലെ സി.സി.ബി ഓഫിസിലെത്തിച്ച് ചോദ്യംചെയ്തു. കേസില്‍ അറസ്റ്റിലായ ഇവന്റ് മാനേജര്‍ വിരേന്‍ ഖന്നയുമായി അടുത്ത ബന്ധമുള്ള ആദിത്യയുടെ ഹെബ്ബാളിലെ ആഡംബര വീട്ടില്‍വെച്ച് സെലിബ്രിറ്റികള്‍ പങ്കെടുത്ത നിരവധി ലഹരിപാര്‍ട്ടികള്‍ നടന്നതായി അന്വേഷണ സംഘം കണ്ടെത്തിയിരുന്നു. സെപ്റ്റംബര്‍ 15ന് സി.സി.ബി സംഘം ആദിത്യയുടെ വീട്ടില്‍ നടത്തിയ റെയ്ഡില്‍ കണ്ടെടുത്ത സി.സി.ടി.വി ദൃശ്യങ്ങളില്‍നിന്നാണ് ഇതുസംബന്ധിച്ച തെളിവുകള്‍ ലഭിച്ചത്.