തിരുവിതാംകൂര്‍ ദേവസ്വം ബോര്‍ഡില്‍ പുതിയ നിയമനങ്ങള്‍ക്കു കര്‍ശന നിയന്ത്രണം

തിരുവനന്തപുരം: വരുമാനം കുറഞ്ഞ് സാമ്പത്തിക പ്രതിസന്ധിയിലായ തിരുവിതാംകൂര്‍ ദേവസ്വം ബോര്‍ഡില്‍ പുതിയ നിയമനങ്ങള്‍ക്ക് കര്‍ശന നിയന്ത്രണം. കഴിഞ്ഞ പത്ത് മാസത്തെ വരുമാന നഷ്ടം 400 കോടിയായി ഉയര്‍ന്നു. കോവിഡ് കാരണം തിരുവിതാംകൂര്‍ ദേവസ്വം ബോര്‍ഡിന്റെ സാമ്പത്തിക നില അതീവ ദുര്‍ബലമായിരിക്കുകയാണ്.

ശബരിമലയിലെ വരുമാനം കഴിഞ്ഞ വര്‍ഷത്തേതിന്റെ അഞ്ച് ശതമാനം മാത്രമായി ചുരുങ്ങി. എന്നാല്‍ ചെലവാകട്ടെ ക്രമാതീതമായി വര്‍ധിക്കുകയും ചെയ്തു. മകരവിളക്ക് കാലത്ത് ആര്‍ടിപിസിആര്‍ ടെസ്റ്റ് നിര്‍ബന്ധമാക്കിയിട്ടുണ്ട്. അതിനാല്‍ ഭക്തര്‍ വീണ്ടും കുറയുമോയെന്ന ആശങ്കയും ബോര്‍ഡിനുണ്ട്.

കഴിഞ്ഞ മാര്‍ച്ച് മുതല്‍ ക്ഷേത്രങ്ങളില്‍ ഭക്തര്‍ക്ക് പ്രവേശനം അനുവദിക്കാതിരുന്നതും പിന്നീട് പ്രവേശനത്തില്‍ നിയന്ത്രണം ഏര്‍പ്പെടുത്തിയതും ബോര്‍ഡിന് വന്‍വരുമാന നഷ്ടമുണ്ടാക്കി. മാര്‍ച്ച് മുതല്‍ ഇതുവരെ 400 കോടിയുടെ വരുമാന നഷ്ടമാണുണ്ടായത്. സര്‍ക്കാര്‍ നാലു തവണയായി 50 കോടി ബോര്‍ഡിന് നല്‍കി. വരുമാനത്തില്‍ കുറവുണ്ടാകുമ്പോഴും ചെലവ് കുറയുന്നതുമില്ല. കഴിഞ്ഞ ശബരിമല സീണസില്‍ ലഭിച്ചതിന്റ അഞ്ച് ശതമാനം മാത്രമാണ് ഇത്തവണ ലഭിച്ചതെന്ന് ബോര്‍ഡ് പ്രസിഡന്റ് എന്‍.വാസു പറഞ്ഞു. സാമ്പത്തിക പ്രതിസന്ധിയെ തുടര്‍ന്ന് ബോര്‍ഡിലെ നിയമനങ്ങള്‍ നിര്‍ത്തിവച്ചു. അവശ്യം വേണ്ട നിയമനങ്ങള്‍ മാത്രം നടത്താനാണ് തീരുമാനം.