കേരള കോണ്‍ഗ്രസിന്റെ സാന്നിധ്യം എല്‍ഡിഎഫിനെ ശക്തമാക്കി: ജോസ് കെ മാണി

ആദ്യഘട്ട തദ്ദേശ തെരഞ്ഞെടുപ്പിനായി സംസ്ഥാനത്തെ അഞ്ച് ജില്ലകള്‍ നാളെ പോളിംഗ് ബൂത്തിലേക്ക് നീങ്ങാനൊരുങ്ങവെ പ്രതികരണവുമായി ജോസ് കെ മാണി. കേരള കോണ്‍ഗ്രസിന്റെ സാന്നിധ്യം എല്‍ഡിഎഫിനെ ശക്തമാക്കിയെന്ന് ജോസ് കെ മാണി. തദ്ദേശ തെരഞ്ഞെടുപ്പില്‍ എല്‍ഡിഎഫിന് റെക്കോഡ് ഭൂരിപക്ഷം ലഭിക്കും.'നേരത്തെ പൊതുവില്‍ മറ്റിടങ്ങളിലൊക്കെ എല്‍ഡിഎഫ് മേല്‍ക്കൈ നേടിയ സ്ഥിതിയിലും കോട്ടയത്ത് യുഡിഎഫിനായിരുന്നു മേല്‍ക്കൈ ഉണ്ടായിരുന്നത്. കേരളകോണ്‍ഗ്രസ് ഇല്ലാത്ത യുഡിഎഫിന് ഇത്തവണ മുന്നേറ്റമുണ്ടാക്കാനാകില്ല. കോട്ടയത്ത് ഉള്‍പ്പടെ യുഡിഎഫിന് വന്‍ പരാജയം നേരിടേണ്ടി വരും. രണ്ടില ചിഹ്നം കിട്ടിയത് കൊണ്ട് അണികളെ ഒപ്പം നിര്‍ത്താനായി'.
കേരള കോണ്‍ഗ്രസ് ജോസ് കെ മാണി വിഭാഗം എല്‍ഡിഎഫ് പ്രവേശനം നേടിയ ശേഷമുള്ള ആദ്യ തെരെഞ്ഞെടുപ്പാണ് നാളെ നടക്കുന്നത്. മുന്നണിമാറ്റം ശരിയോ തെറ്റോ, പതിറ്റാണ്ടുകളുടെ യുഡിഎഫ് ബന്ധം ഉപേക്ഷിച്ചത് ജനം അംഗീകരിച്ചോ എന്നതടകകം ഈ തദ്ദേശതെരഞ്ഞെടുപ്പോടെ വ്യക്തമാകും. കോട്ടയത്തടക്കം സീറ്റ് വിഭജനത്തില്‍ എല്‍ഡിഎഫിനുള്ളില്‍ സിപിഐ എതിര്‍പ്പുയര്‍ത്തി രംഗത്തെത്തിയിരുന്നെങ്കിലും ഒടുവില്‍ പലയിടത്തും അനുനയനമാണുണ്ടായത്.