സ്ഥാനാര്‍ഥിക്കെതിരെ ചിട്ടി കമ്പനിയിലെ ജീവനക്കാര്‍ പട്ടിണിസമരം നടത്തി

മതിലകം ബ്ലോക്ക് പഞ്ചായത്ത് യുഡിഎഫ് സ്ഥാനാര്‍ഥിക്കെതിരെ ഫിന്‍സിയര്‍ ചിട്ടീസ് കമ്പനിയിലെ ജീവനക്കാര്‍ പട്ടിണിസമരം നടത്തി. മതിലകം ബ്ലോക്ക് പഞ്ചായത്തിലേക്ക് മത്സരിക്കുന്ന മതിലകം ഡിവിഷന്‍ യുഡിഎഫ് സ്ഥാനാര്‍ഥി സന്ധ്യ ദിലീപ് വലിയപറമ്പിലിനെതിരെയാണ് ഇന്നലെ മതിലകം സെന്റെറില്‍ സമരം നടത്തിയത്. കൊടുങ്ങല്ലൂര്‍ ആസ്ഥാനമായി പ്രവര്‍ത്തിക്കുന്ന ഫിന്‍സിയര്‍ കമ്പനിയുമായി നടത്തിയ ഭൂമിയിടപാടില്‍ ആറരക്കോടി രൂപ ലഭിക്കാത്തത് കൊണ്ട് കമ്പനി പൂട്ടേണ്ടി വന്നു.സാമ്പത്തിക ബുദ്ധിമുട്ടുകള്‍ക്കിടയിലും കുറി വിളിച്ചവരുടെ പണം കൃത്യമായി നല്‍കിയിരുന്നു. നവംബര്‍ മുപ്പതാം തിയ്യതി പണം നല്‍കാന്‍ കഴിയാതെയായപ്പോള്‍ കസ്റ്റമേഴ്‌സ് ജീവനക്കാരെ കുറി ഓഫീസില്‍ പൂട്ടിയിട്ട് അസഭ്യം പറഞ്ഞു. പല ജീവനക്കാരുടെ വീടുകളിലും ഇവരെത്തിയതോടെ ജീവനക്കാര്‍ ആത്മഹത്യയുടെ വക്കിലാണ്. ഇവര്‍ പണം തരാത്തതാണ് കമ്പനി അടച്ചിടുവാന്‍ ഇടവരുത്തിയത്. സാധാരണക്കാരായ ജനങ്ങളുടെ പണം തിരിച്ച് കൊടുക്കുവാനും കമ്പനി തുറക്കുവാനും ഇവരുടെ പണം കിട്ടിയാല്‍ മാത്രമെ കഴിയുമെന്ന് സമരത്തില്‍ പങ്കെടുത്തവര്‍ പറഞ്ഞു. സമരത്തിന് സീനത്ത് ബഷീര്‍, വാസന്തി രഘു, വിജയ സുരേഷ് എന്നിവര്‍ നേതൃത്വം നല്‍കി. സമരം തുടങ്ങിയതോടെ സിപിഎം പ്രവര്‍ത്തകരും കോണ്‍ഗ്രസ് പ്രവര്‍ത്തകരും ഇരു ചേരികളിലായി അണിനിരന്നു. മതിലകം പൊലീസ് സിപിഎം പ്രവര്‍ത്തകരോട് പിരിഞ്ഞ് പോകാന്‍ ആവശ്യപ്പെട്ടത് ചെറിയ വാക്ക് തര്‍ക്കത്തിനിടവരുത്തി. കോണ്‍ഗ്രസ് പ്രവര്‍ത്തകര്‍ പിരിഞ്ഞ് പോയതിന് ശേഷമാണ് സിപിഎം പ്രവര്‍ത്തകര്‍ പിരിഞ്ഞ് പോയത്. അതെ സമയം യുഡിഎഫ് സ്ഥാനാര്‍ത്ഥിയെ ആപകീര്‍ത്തിപ്പെടുത്തുവാനും വ്യക്തിഹത്യ നടത്തുന്നതിനും എതിര്‍ സ്ഥാനാര്‍ത്ഥി ഷീജ ബാബുവിന് വേണ്ടി ഇടതു പക്ഷ പ്രവര്‍ത്തകര്‍ ഫിന്‍സിയര്‍ തൊഴിലാളികളെന്ന പേരില്‍ രാഷ്ട്രീയ പ്രേരിതമായ സമരം നടത്തുന്നവര്‍ക്കെതിരെ നിയമ നടപടികള്‍ സ്വീകരിക്കണമെന്നാവശ്യപ്പെട്ട് ഐക്യജനാധിപത്യ മുന്നണി തെരഞ്ഞെടുപ്പ് കമ്മറ്റി ചെയര്‍മാന്‍ ഷിബു വര്‍ഗീസ് മതിലകം പൊലീസില്‍ പരാതി നല്‍കി.