അണികള്‍ക്ക് ആവേശം പകര്‍ന്ന് മന്ത്രി ശൈലജ, കൊവിഡ് മാനദണ്ഡം മറക്കാതെ പ്രചാരണം

അവസാന ലാപ്പിലെത്തിയ തെരഞ്ഞെടുപ്പ് പ്രചാരണത്തില്‍ ഇടതുമുന്നണിക്ക് ആവേശം പകര്‍ന്ന് ആരോഗ്യമന്ത്രി കെകെ ശൈലജ രംഗത്തിറങ്ങി. കൊവിഡ് പ്രതിരോധത്തെ കുറിച്ച് പറഞ്ഞായിരുന്നു ആരോഗ്യമന്ത്രിയുടെ വോട്ടുപിടിത്തം. കൊവിഡിനെ തോല്‍പിക്കാനുള്ള തിരക്കില്‍ നിന്ന് തെരഞ്ഞെടുപ്പില്‍ സ്ഥാനാര്‍ഥികളെ ജയിപ്പിക്കാന്‍ മന്ത്രി എത്തിയപ്പോള്‍ അണികളില്‍ ഇരട്ടി ആവേശം പ്രകടമായിരുന്നു. മാസ്‌കിട്ട് ഗ്യാപ്പിട്ട് നില്‍ക്കാന്‍ അണികളെ സ്‌നേഹത്തോടെ നിര്‍ദേശിച്ച ആരോഗ്യമന്ത്രിക്ക് പ്രചാരണത്തിനിടെയിലും ശ്രദ്ധ ചുറ്റുമുള്ളവരുടെ ആരോഗ്യത്തില്‍ തന്നെ.
രാഷ്ട്രീയം പറയാതെ സര്‍ക്കാര്‍ കൊവിഡില്‍ അടക്കം ആരോഗ്യമേഖലയില്‍ ചെയ്ത പ്രവര്‍ത്തനങ്ങള്‍ എണ്ണിപ്പറഞ്ഞായിരുന്നു പ്രസംഗം. എങ്കിലും അവസാനം കിഫ്ബിയും കെഫോണും ഉയര്‍ത്തി പ്രതിപക്ഷത്തിനിട്ട് ചെറിയൊരു കൊട്ട്. വനിത സ്ഥാനാര്‍ഥികള്‍ മത്സരിക്കുന്ന വാര്‍ഡുകളിലായിരുന്നു ആരോഗ്യമന്ത്രിയുടെ പ്രചാരണം. പൊതുവേദികളില്‍ സംസാരിക്കുമ്പോള്‍ നേതാക്കള്‍ മാസ്‌ക് അഴിക്കുന്ന പതിവ് കാഴ്ചയില്‍ നിന്നും വ്യത്യസ്തമായി മുഴുവന്‍ സമയം മാസ്‌കണിഞ്ഞായിരുന്നു മന്ത്രിയുടെ പ്രചാരണം.