പൊന്നികുട്ടി മുത്തശ്ശിയുടെ കാത്തിരിപ്പിന് ഫലം കാണുമോ?

ജയിച്ചു വന്നാല്‍ തനിക്ക് കിട്ടുന്ന ഓണറേറിയം എല്ലാ മാസവും വാര്‍ഡിലെ നിര്‍ധനരായ കിടപ്പുരോഗികള്‍ക്ക് മരുന്നിനായി നല്‍കുമെന്ന്  നയം പ്രഖ്യപിച്ച് പോരാട്ടത്തിനിറങ്ങിയിരിക്കുകയാണ് അന്തിക്കാട് ഗ്രാമപഞ്ചായത്തിലെ പതിനാലാം വാര്‍ഡ് എല്‍ഡിഎഫ് സ്ഥാനാര്‍ഥി ഷെഫീര്‍ അബ്ദുള്‍ ഖാദര്‍. നയം വ്യക്തമാക്കപ്പെടുകയും അത് നവമാധ്യമങ്ങളില്‍ വൈറലാവുകയും ചെയ്തതോടെ മുഴുവന്‍ എല്‍ഡിഎഫ് സ്ഥാനാര്‍ഥികള്‍ക്കും ഇത് വലിയ ഊര്‍ജ്ജമായി കഴിഞ്ഞു. ഷഫീറിന്റെ മിന്നുന്ന വിജയം  പ്രതീക്ഷിച്ച് വാര്‍ഡിലെ കിടപ്പ് രോഗിയായ തൊണ്ണൂറ് വയസുള്ള മങ്ങാട്ട് പൊന്നി കുട്ടിയും കാത്തിരിപ്പിലാണ്. തീര്‍ത്തും നിര്‍ധനയായ പൊന്നിക്കുട്ടിക്ക് ഷഫീര്‍ വിജയിച്ചാല്‍ മരുന്നിനുള്ള വകയെത്തുമെന്ന വാഗ്ദാനം പറഞ്ഞറിയിക്കാനാകാത്ത സന്തോഷമാണ് നല്‍കിയത്. പുതിയ തലമുറയില്‍ പെട്ട ഷെഫീറിനെ പോലെയുള്ളവര്‍ പാവങ്ങളുടെ പ്രശ്‌നങ്ങളിലേക്ക് നേരിട്ടിടപെടാന്‍ കാണിക്കുന്ന ശുഷ്‌കാന്തി നാട്ടില്‍ ചര്‍ച്ചയായി കഴിഞ്ഞു. പൊതുരംഗത്ത് നിറസാനിധ്യമായിരുന്ന പരേതനായ പണിക്കവീട്ടില്‍ അബ്ദുദുള്‍ കാദറിന്റെ ( ഹാപ്പി കാദര്‍ ) മകനാണ് ഷെഫീര്‍. വാപ്പയുടെ തൊഴില്‍ സംരംഭമായ ഹാപ്പി സോപ്പ് പൊടിയുടെ നടത്തിപ്പുകാരനായ ഷെഫീര്‍ തൊഴിലിനെ വേറിട്ടു നിറുത്തി നികുതി ദായകന്റെ പണം അവരിലെ തന്നെ നിര്‍ധനരായവരിലേക്ക് തിരിച്ചെത്തിക്കുക എന്ന ചിന്തയാണ് പങ്ക് വെയ്ക്കുന്നത്.