സെപ്റ്റംബർ ഒന്നു മുതൽ ദോഹ മെട്രോ

ഖത്തര്‍ കോവിഡ്  ജീവിതശൈലിയോട് ഇണങ്ങിച്ചേർന്ന്  ഉഷാറായി തുടങ്ങി. ദോഹ മെട്രോ ഉൾപ്പെടെയുള്ള പൊതു ഗതാഗത സൗകര്യങ്ങൾ പുനരാരംഭിച്ചിട്ടില്ല എന്നതൊഴിച്ചാൽ മറ്റ് മേഖലകളെല്ലാം സാധാരണ നിലയിലേക്ക് എത്തി കഴിഞ്ഞു. കോവിഡ്-19 നിയന്ത്രണങ്ങളിലെ മൂന്നാം ഘട്ട ഇളവുകൾ ആരംഭിച്ചതോടെയാണ് രാജ്യം വീണ്ടും തിരക്കിലേക്ക് പ്രവേശിച്ചത്. സെപ്റ്റംബർ ഒന്നു മുതൽ സ്‌കൂളുകളും തുറക്കും. നിയന്ത്രണങ്ങളിലെ ഇളവ് പിൻവലിക്കുന്നതിന്റെ അവസാനത്തെയും നാലാമത്തെയും ഘട്ടം സെപ്റ്റംബർ ഒന്നിന് ആരംഭിക്കുന്നതോടെ സമസ്ത മേഖലകളും 100 ശതമാനം പ്രവർത്തനസജ്ജമാകും. കോവിഡ് വ്യാപനം കുറഞ്ഞ രാജ്യങ്ങളിൽ നിന്നുള്ള വിമാനങ്ങൾക്ക് രാജ്യത്തേക്ക് പ്രവേശിക്കുകയും ചെയ്യാം.   ദോഹ മെട്രോ, കർവ ബസ് തുടങ്ങിയ പൊതു ഗതാഗത സംവിധാനങ്ങൾ മാത്രമാണ് ഇനിയും പുനരാരംഭിക്കാത്തത്. ദോഹ മെട്രോയുടെ അഭാവം പ്രവാസികളുടെ ഓഫിസ്, വാരാന്ത്യ യാത്രകളെ സാരമായി ബാധിച്ചിട്ടുണ്ട്. സെപ്റ്റംബർ ഒന്നു മുതൽ ദോഹ മെട്രോ ഉൾപ്പെടെയുള്ള പൊതുഗതാഗത സൗകര്യങ്ങൾ ഭാഗികമായി പുനരാരംഭിക്കുമെന്നാണ് അധികൃതരുടെ പ്രഖ്യാപനം. കോവിഡ് മുൻകരുതൽ പാലിച്ചു കൊണ്ടായിരിക്കും മെട്രോ, ബസ് യാത്രകളും ആരംഭിക്കുക.   കോവിഡ്-19 പ്രതിസന്ധിയെ തുടർന്ന് നാട്ടിലേക്ക് മടങ്ങാൻ ഇന്ത്യൻ എംബസിയിൽ റജിസ്റ്റർ ചെയ്ത ഒട്ടുമിക്കവരും യാത്ര വേണ്ടെന്ന തീരുമാനത്തിലേക്ക് എത്തി തുടങ്ങി. ഖത്തർ സാധാരണ നിലയിലേക്ക് എത്തിയതും പുതിയ തൊഴിലവസരങ്ങളുമെല്ലാമാണ് പ്രവാസികളുടെ നാട്ടിലേക്കുള്ള മടക്ക ചിന്തകളുടെ വഴിമാറ്റിയത്. സ്വകാര്യ മേഖലയിൽ കോവിഡ് പ്രതിസന്ധിയിൽ ജോലി നഷ്ടപ്പെട്ട ഖത്തർ ഐഡിയുള്ള വിദഗ്ധ പ്രവാസി തൊഴിലാളികൾക്ക് പുത്തൻ തൊഴിലവസരങ്ങൾ പ്രദാനം ചെയ്തു കൊണ്ട്  ഖത്തർ ചേംബറും തൊഴിൽ മന്ത്രാലയവും ചേർന്ന് റീ-എംപ്ലോയ്‌മെന്റ് പോർട്ടൽ ആരംഭിച്ചതോടെ ജോലി നഷ്ടമായ പ്രവാസികളുടെ പ്രതീക്ഷകൾക്ക് ചിറകു മുളച്ചു തുടങ്ങി. തൊഴിലവസരങ്ങൾ ഹോട്ടൽ, റസ്റ്ററന്റ്, ഡ്രൈവിങ്, ഡെലിവറി, പാക്കിങ് തുടങ്ങി ഒട്ടേറെ മേഖലകളിലും തൊഴിലവസരങ്ങൾ വർധിച്ചു തുടങ്ങി. എന്നാൽ ജാഗ്രതയോടെ വേണം അവസരങ്ങൾ തിരഞ്ഞെടുക്കാനെന്ന് അധികൃതർ ഓർമപ്പെടുത്തുന്നുണ്ട്. സമൂഹമാധ്യമങ്ങളിലും ഓൺലൈനുകളിലുമെല്ലാം തൊഴിലവസരങ്ങളുടെ പ്രവാഹം ശ്രദ്ധയിൽപ്പെട്ടതോടെ അനധികൃത സ്ഥാപനങ്ങളുടെ വ്യാജ തൊഴിലവസരങ്ങളിൽ ജാഗ്രത പുലർത്തണമെന്നാണ് തൊഴിൽ മന്ത്രാലയത്തിന്റെ മുന്നറിയിപ്പ്.