ശ്രീലങ്കയ്‌ക്ക്‌ 40 കോടി ഡോളർ വായ്‌പ

കറൻസി കൈമാറ്റ സംവിധാനത്തിൽ ഇന്ത്യ ശ്രീലങ്കയ്‌ക്ക്‌ 40 കോടി ഡോളർ വായ്‌പ നൽകും. ഇതിനാവശ്യമായ രേഖകളിൽ റിസർവ്‌ ബാങ്ക്‌ ഒപ്പിട്ടതായി ശ്രീലങ്കയിലെ ഇന്ത്യൻ ഹൈകമീഷൻ വാർത്താ കുറിപ്പിൽ അറിയിച്ചു. ശ്രീലങ്കയുടെ വിദേശനാണ്യശേഖരം ചുരുങ്ങിവരുന്നതിനാലാണ്‌ ഇന്ത്യ നൽകുന്നത്‌.

പകരം  മറ്റൊരു നാണ്യം തരും

ഇന്ത്യ ഡോളർ വായ്‌പയായി നൽകുന്നതിനു പകരം ശ്രീലങ്ക മറ്റൊരു നാണ്യം തരും. വിദേശനാണ്യ വിപണിയിൽനിന്ന്‌ കടമെടുക്കുന്നതിലും പലിശ കുറവായിരിക്കും രാജ്യങ്ങൾ തമ്മിലുള്ള ഈ ഇടപാടിന്‌. സാർക്ക്‌ ചട്ടക്കൂടനുസരിച്ച്‌ ഇന്ത്യയുടെ റിസർവ്‌ ബാങ്കിൽനിന്ന്‌ 40 കോടി ഡോളർ ലഭിക്കാൻ കരാറുണ്ടാക്കുമെന്ന്‌ ശ്രീലങ്ക ഏപ്രിലിൽ അറിയിച്ചിരുന്നു. പിന്നീട്‌ പ്രസിഡന്റ്‌ ഗോതബയ രാജപക്‌സെ മേയിൽ 110 കോടി ഡോളർകൂടി അഭ്യർഥിച്ചിട്ടുണ്ട്‌.

2022 നവംബർവരെ

കറൻസി കൈമാറ്റ സൗകര്യം 2022 നവംബർവരെ ലഭ്യമായിരിക്കുമെന്ന്‌ ഹൈകമീഷന്റെ വാർത്താക്കുറിപ്പിൽ വ്യക്തമാക്കി. ഇത്‌ ശ്രീലങ്കയുമായി ചേർന്ന്‌ പ്രവർത്തിക്കുന്നതിൽ ഇന്ത്യയുടെ ശക്തമായ പ്രതിബദ്ധതയുടെ മറ്റൊരു ഉദാഹരണമാണെന്നും വാർത്താക്കുറിപ്പിൽ തുടർന്നു. തീരുമാനം ഹൈകമീഷൻ ശ്രീലങ്കൻ സർക്കാരിനെയും സെൻട്രൽ ബാങ്ക്‌ ഓഫ്‌ ശ്രീലങ്കയെയും അറിയിച്ചിട്ടുണ്ട്‌. ഇന്ത്യയുടെ ഡെപ്യൂട്ടി ഹൈകമീഷണർ വിനോദ്‌ കെ ജോൺ കറൻസി കൈമാറ്റ വ്യവസ്ഥകൾ സംബന്ധിച്ച്‌ ലങ്കൻ സെൻട്രൽ ബാങ്ക്‌ ഗവർണറുമായി ചർച്ച നടത്തിയിരുന്നു. ശ്രീലങ്കയുടെ വായ്‌പാ തിരിച്ചടവ്‌ പുനഃക്രമീകരിക്കുന്നതിന്റെ സാങ്കേതികവശങ്ങൾ ഇരുരാജ്യങ്ങളും ബുധനാഴ്‌ച ചർച്ച ചെയ്‌തിരുന്നു.