ദിലീപ് സുരക്ഷിതനല്ല, എന്നിട്ടും നടന് കേരളാ പൊലീസിനോട് പരാതിയില്ല, എന്തുകൊണ്ട്?

ദിലീപിന്റെ സുരക്ഷ സ്വകാര്യ ഏജന്‍സിക്ക്,സുരക്ഷ ചൂണ്ടിക്കാട്ടി കേരളാ പൊലീസിനെ സമീപിക്കാതിരുന്നതെന്തുകൊണ്ട്?

നടിയെ ആക്രമിച്ച കേസില്‍ ഗൂഡാലോചനകുറ്റം ചുമത്തപ്പെട്ട് ജയിലിലായ നടന്‍ ദിലീപ് ജാമ്യത്തിലിറങ്ങിയ ഉടനെ തനിക്ക് സുരക്ഷയൊരുക്കാന്‍ സ്വകാര്യ ഏജന്‍സിയായ തണ്ടര്‍ ഫോഴ്‌സിനെ ഏല്‍പിച്ചതായാണ് ഏറ്റവും പുതിയ റിപ്പോര്‍ട്ടുകള്‍.ജനരോഷം ഭയന്നും ആക്രമണം ഭയന്നുമാണ് സുരക്ഷ സ്വകാര്യ ഏജന്‍സിയെ ഏല്‍പിച്ചതെന്നാണ് പുറത്തുവരുന്ന വാര്‍ത്തകള്‍.ഗോവ ആസ്ഥാനമായി പ്രവര്‍ത്തിക്കുന്ന സ്വകാര്യ സുരക്ഷാ ഏജന്‍സിയാണ് ദിലീപിന് സുരക്ഷയൊരക്കുന്നത്.തോക്കുള്‍പ്പടെയുള്ള ആയുധങ്ങള്‍ തണ്ടര്‍ ബോള്‍ട് എന്ന സുരക്ഷാ ഏജന്‍സി അവരുടെ വാഹനത്തില്‍ കരുതാറുമുണ്ട്.

ദിലീപ് ജനമധ്യത്തില്‍ ആക്രമിക്കപ്പെടാന്‍ സാധ്യതയുണ്ടെന്ന് നേരത്തേ സൂചനയുണ്ടായിരുന്നു.എന്നാല്‍ ഇത്തരത്തില്‍ സുരക്ഷാ പ്രശ്‌നങ്ങള്‍ ഉന്നയിച്ച് നടന്‍ പൊലീസിനെ സമീപിച്ചിട്ടില്ലെന്ന് ആലുവ റൂറല്‍ എസ്പി ഏ വി ജോര്‍ജ്ജും പറയുന്നു.

ഇനി അടുത്ത പ്രശ്‌നം കടുത്ത ജാമ്യ വ്യവസ്ഥകളോടെ പുറത്തിറങ്ങിയ നടന് ഇത്തരമൊരു സുരക്ഷാ ഏജന്‍സിയെ തന്റെ സുരക്ഷയേല്‍പിക്കുന്നതില്‍ എന്തെങ്കിലും നിയമപ്രശ്‌നമുണ്ടോയെന്നതാണ്.കോടതി പറഞ്ഞിരിക്കുന്ന ജാമ്യ വ്യവസ്ഥയില്‍ നടന്റെ സുരക്ഷാ ചുമതല മറ്റൊരാളേയോ ഇത്തരത്തിലൊരു കമ്പനിയേയോ ഏല്‍പിക്കരുതെന്ന് പറയാനുള്ള സാധ്യത തീരെയില്ല.അതുകൊണ്ട് നിയമപ്രശ്‌നങ്ങള്‍ ഉണ്ടാകാനുള്ള സാധ്യതയും ഇല്ല. പിന്നെ സുരക്ഷാപ്രശ്‌നങ്ങള്‍ ചൂണ്ടിക്കാട്ടി ദിലീപ് കേരളാ പൊലീസിന് സമീപിക്കാതിരുന്നതെന്തുകൊണ്ടാണെന്ന ചോദ്യം മാത്രമാണ്

മാത്രമല്ല ഇന്‍ഡ്യയിലെ പല ബിസിനസ് പ്രമുഖരും ബോളിവുഡിലേയും കോളിവുഡിലേയും റ്റോളിവുഡിലേയും ഉള്‍പ്പടെയുള്ള പലരും ഇത്തരത്തില്‍ സുരക്ഷയ്ക്കായി സുരക്ഷാ ഏജന്‍സിയുടെ സഹായം തേടാറുമുണ്ട്.ഇന്‍ഡ്യന്‍ കമ്പനി രജിസ്‌ട്രേഷന്‍ ആക്ട് അനുസരിച്ച് തന്നെയാണ് ഇത്തരത്തിലുള്ള ഏജന്‍സികള്‍ പ്രവര്‍ത്തിക്കുന്നതുംഇത്തരത്തില്‍ നിരവധി കമ്പനികള്‍ ഇന്‍ഡ്യയില്‍ രജിസ്റ്റര്‍ ചെയ്യപ്പെട്ടിട്ടുണ്ട്.മാത്രമല്ല സെക്യൂരിറ്റി ഉദ്യോഗസ്ഥരായി വിവിധ സംസ്ഥാനങ്ങളിലെ പൊലീസ് വകുപ്പുകളില്‍ നിന്ന് വിരമിച്ച ഉന്നത ഉദ്യോഗസ്ഥര്‍ ഉള്‍പ്പടെയുള്ളവര്‍,വിമുക്തഭടന്‍മാര്‍ എന്നിവര്‍ സേവനം ചെയ്യുന്നുണ്ട്.തോക്ക് കൈവശം വെക്കുന്നതിനും മറ്റും സര്‍ക്കാര്‍ ഇത്തരം ഏജന്‍സികള്‍ക്ക് ലൈസന്‍സ് നല്‍കാറുമുണ്ട്.

2012 മുതല്‍ ഇന്‍ഡ്യയില്‍ പ്രവര്‍ത്തിക്കുന്ന തണ്ടര്‍ ബോള്‍ട്ടിനാണ് ദിലീപിന്റെ സുരക്ഷാ ചുമതല.രാജ്യത്ത് പത്ത് സംസ്ഥാനങ്ങളിലും ദുബായിലും പ്രവര്‍ത്തിക്കുന്ന ഏജന്‍സിക്ക് നിരവധി വിവിഐപി ക്ലൈന്റ്‌സ് നിലവിലുണ്ട്.മലയാളിയും റിട്ട.ഐപിഎസ് ഓഫീസറുമായ പി എ വല്‍സനാണ് തണ്ടര്‍ ഫോഴ്‌സിന്റെ കേരളത്തിലെ പ്രവര്‍ത്തനങ്ങള്‍ ഏകോപിപ്പിക്കുന്നത്.നാവിക സേനാ മുന്‍ ഉദ്യോഗസ്ഥനായ കാസര്‍കോഡ് സ്വദേശി അനില്‍ നായരാണ് തണ്ടര്‍ ബോള്‍ട് ലിമിറ്റഡിന്റെ ഉടമ.

രാജ്യത്തുടനീളം നിരവധി പ്രമുഖര്‍ക്കും നിരവധി സ്ഥാപനങ്ങള്‍ക്കും സുരക്ഷയൊരുക്കുന്ന തണ്ടര്‍ ബോള്‍ട്ടിന് കേരളത്തില്‍ മൂന്നു വ്യവസായ പ്രമുഖരും ദിലീപും ഉള്‍പ്പടെ നിലവില്‍ നാല് കസ്റ്റമേഴ്‌സാണുള്ളത്. കേരളാ പോലീസിന്റെ തണ്ടര്‍ ബോള്‍ട് വിങ്ങിന്റെ പേരിനോട് സാദൃശ്യമുള്ളതും അവരുടെ യൂണിഫോമിനോട് സമാനതയുള്ളതുമായ യൂണിഫോമുമാണ് തണ്ടര്‍ഫോഴ്‌സിനുള്ളത്.രണ്ടും പ്രവര്‍ത്തനം ആരംഭിച്ചത് 2012 ലാണ്.