ഇരുപത്തെട്ട് വര്‍ഷത്തെ ഇടവേളയ്ക്ക് ശേഷം ലോഡ്‌സില്‍ ഇന്ത്യന്‍ വിജയം

ലണ്ടന്‍: ഇരുപത്തിയെട്ട് വര്‍ഷത്തെ ഇടവേളയ്ക്ക് ശേഷം ഇന്ത്യ ചരിത്രപ്രധാനമായ ലോഡ്‌സ് ക്രിക്കറ്റ് ഗ്രൗണ്ടില്‍ രണ്ടാമത്തെ ടെസ്റ്റ് വിജയം നേടി. ജയിക്കാന്‍ രണ്ടാമിന്നിംഗ്‌സില്‍ 319 റണ്‍സ് വേണ്ടിയിരുന്ന ഇംഗ്ലണ്ട് 223 റണ്‍സിന് ഓള്‍ ഔട്ട് ആവുകയായിരുന്നു. ഇതോടെ ഇന്ത്യ 95 റണ്‍സിന്റെ വിജയം കുറിച്ചു. രണ്ടാമിന്നിംഗ്‌സില്‍ ഏഴ് വിക്കറ്റ് വീഴ്ത്തി ആതിഥേയരെ ഞെട്ടിച്ച ഇഷാന്ത് ശര്‍മയാണ് മാന്‍ ഓഫ് ദ മാച്ച്. 1986 ല്‍ കപില്‍ദേവിന്റെ നേതൃത്വത്തിലുള്ള ഇന്ത്യന്‍ ടീമായിരുന്നു ക്രിക്കറ്റിന്റെ മെക്ക എന്നറിയപ്പെടുന്ന ലോഡ്‌സില്‍ ഇന്ത്യയ്ക്ക് ആദ്യ വിജയം സമ്മാനിച്ചത്. നാലിന് 105 എന്ന നിലയില്‍ അഞ്ചാം ദിവസം കളി പുനരാരംഭിച്ച ഇംഗ്ലണ്ടിന് വേണ്ടി ജോ റൂട്ടും മൊയിന്‍ അലിയും ശക്തമായ ചെറുത്ത് നില്‍പ്പാണ് നടത്തിയത്. നാലാം ദിവസത്തെ അവസാന സെക്ഷനില്‍ ബൗളര്‍മാര്‍ക്കുണ്ടായിരുന്ന ആധിപത്യം അഞ്ചാം ദിവസത്തിന്റെ തുടക്കത്തില്‍ ഉണ്ടായിരുന്നില്ല. ഇത് മുതലെടുത്ത ഇരുവരും ആക്രമണവും പ്രതിരോധവും ഇടകലര്‍ത്തി ഇന്ത്യന്‍ ബൗളിംഗിന്റെ മുന ഒടിച്ചു. എന്നാല്‍ ഉച്ചഭക്ഷണത്തിന് പിരിയുന്നതിന് തൊട്ടുമുമ്പ് ഇന്ത്യ തന്ത്രം മാറ്റി. അതുവരെ പരീക്ഷിക്കാതിരുന്ന ഷോട്ട് പിച്ച് ബോളുകള്‍ എറിയാന്‍ ഇഷാന്ത് ശര്‍മ നിയോഗിക്കപ്പെട്ടു. ഉടനടി ഫലം ഉണ്ടാവുകയും ചെയ്തു. ഉച്ചഭക്ഷണത്തിന് മുമ്പുള്ള അവസാന പന്തില്‍ ഇഷാന്ത് ശര്‍മയുടെ ഷോട്ട്പിച്ചില്‍ ബാറ്റ് വച്ച് അലി ചേതേശ്വര്‍ പൂജാരയ്ക്ക് ലളിതമായ ക്യാച്ച് നല്‍കി മടങ്ങി. ഉച്ചഭക്ഷണത്തിന് ശേഷം ഇന്ത്യയുടെ ഷോട്ട് പിച്ച് ആക്രമണത്തില്‍ ഇംഗ്ലണ്ട് ബാറ്റ്‌സ്മാന്‍മാര്‍ ഈയാംപാറ്റകളെ പോലെ എരിഞ്ഞടങ്ങുന്നതാണ് കണ്ടത്. മാറ്റ് പ്രയര്‍, ബ്രൂക്‌സ്, റൂട്ട് എന്നിവര്‍ ഇഷാന്തിന്റെ ഷോട്ട് പിച്ചില്‍ സ്വയം ബലി കഴിച്ചു. സ്റ്റുവര്‍ട്ട് ബോര്‍ഡിനെ ധോണിയുടെ കൈയില്‍ എത്തിച്ചു കൊണ്ട് ഇഷാന്ത് തന്റെ ടെസ്റ്റ് ജീവിതത്തിലെ ഏറ്റവും മികച്ച പ്രകടനത്തിന് അവകാശിയായി. ഇല്ലാത്ത റണ്ണിന് ഓടാന്‍ ശ്രമിച്ച ജിമ്മി അന്‍ഡേഴ്‌സണെ റണൗട്ടാക്കി ജഡേജ ചടങ്ങുകള്‍ പൂര്‍ത്തിയാക്കി. സ്‌കോര്‍: ഇന്ത്യ: 295, 342, ഇംഗ്ലണ്ട്: 319, 223