നല്ലതു പോലെ കിട്ടിയല്ലോ,ഇനിയെങ്കിലും ഈ നാണംകെട്ട ഒത്തുതീര്‍പ്പു രാഷ്ട്രീയം കോണ്‍ഗ്രസ് അവസാനിപ്പിക്കണം;ബല്‍റാം

പാലക്കാട്:നല്ലതു പോലെ കിട്ടിയല്ലോ,ഇനിയെങ്കിലും ഒത്തു തീര്‍പ്പു രാഷ്ട്രീയം കോണ്‍ഗ്രസിന് അവസാനിപ്പിച്ചൂടെയെന്ന് വി ടി ബല്‍റാം.ടി പി വധക്കേസ് നേരാവണ്ണം അന്വേഷിക്കാതം ഇടയ്ക്കു വെച്ച് അവസാനിപ്പിച്ചു.അതൊരുതരം ഒത്തു തീര്‍പ്പായിരുന്നു.അതിന്റെ കൂലി സോളാറു വഴി കിട്ടിയെന്നും തൃത്താല എംഎല്‍എ പറയുന്നു.സോളാര്‍ കമ്മീഷന്‍ റിപ്പോര്‍ട്ടില്‍ നാണം കെട്ട് തൊലിയുരിഞ്ഞു നില്‍ക്കുന്ന കെപിസിസിയ്ക്കിട്ട് നല്ലൊന്നാന്തരം കുത്താണ് വി ടി നല്‍കിയിരിക്കുന്നത്.ഫേസ് ബുക്കിലൂടെയാണ് വിടിയുടെ പരസ്യ പ്രതികരണം.വി ടിയുടെ പ്രതികരണം വന്ന് ഏറെ കഴിയും മുന്‍പ് നേതാക്കള്‍ പരസ്യമായി പ്രതികരിക്കരുതെന്ന നിര്‍ദ്ദേശം ഹൈക്കമാന്‍ഡ് നല്‍കിയിട്ടുണ്ട് ഫേസ്ബുക് പോസ്റ്റിന്റെ പൂര്‍ണരൂപം സിപിഎമ്മിന്റെയും പിണറായി വിജയന്റേയും ഹീനമായ രാഷ്ട്രീയ വേട്ടയാടലാണ് ഇനിയും പ്രസിദ്ധപ്പെടുത്താത്ത സോളാര്‍ അന്വേഷണക്കമ്മീഷന്‍ റിപ്പോര്‍ട്ടിന്മേല്‍ കോണ്‍ഗ്രസ് നേതാക്കള്‍ക്കെതിരായ തിരക്കുപിടിച്ച നടപടികള്‍. വിശ്വാസ്യതയുടെ തരിമ്പെങ്കിലും ഈ റിപ്പോര്‍ട്ടിനുണ്ടെന്ന് ഇപ്പോഴത്തെ സൂചനകള്‍ വെച്ച് അനുമാനിക്കാന്‍ കഴിയുന്നതല്ല. ഏതായാലും കോണ്‍ഗ്രസ് നേതാക്കളെ സംബന്ധിച്ച് ടിപി ചന്ദ്രശേഖരന്‍ കൊലപാതകത്തിന്റെ പുറകിലെ ഗൂഡാലോചനക്കേസ് നേരാംവണ്ണം അന്വേഷിച്ച് മുന്നോട്ടുകൊണ്ടുപോകാതെ ഇടക്കുവെച്ച് ഒത്തുതീര്‍പ്പുണ്ടാക്കിയതിന് കിട്ടിയ പ്രതിഫലമായി കണക്കാക്കിയാല്‍ മതി. ഇനിയെങ്കിലും അഡ്ജസ്റ്റ്മെന്റ് രാഷ്ട്രീയം അവസാനിപ്പിച്ച് തോമസ് ചാണ്ടിയടക്കമുള്ള ഇപ്പോഴത്തെ കാട്ടുകള്ളന്‍ മന്ത്രിമാര്‍ക്കെതിരെ ശബ്ദമുയര്‍ത്താന്‍ കോണ്‍ഗ്രസ് നേതാക്കന്മാര്‍ തയ്യാറാകണം. 'കോണ്‍ഗ്രസ് മുക്ത് ഭാരത്' എന്നത് ദേശീയതലത്തിലെ ആര്‍എസ്എസിന്റെ പ്രഖ്യാപിത മുദ്രാവാക്യമാണെങ്കില്‍ 'കോണ്‍ഗ്രസ് മുക്ത കേരളം' എന്നതാണ് ഇവിടത്തെ സിപിഎമ്മിന്റെ അപ്രഖ്യാപിത നയം. ആ ഗ്യാപ്പില്‍ ബിജെപിയെ വിരുന്നൂട്ടി വളര്‍ത്തി സര്‍വ്വമേഖലകളിലും പരാജയപ്പെട്ട സര്‍ക്കാരിനെതിരായ ഭരണവിരുദ്ധവികാരത്തെ വഴിതിരിച്ചുവിടാനാണ് ഇന്ന് കേരളം ഭരിക്കുന്നവര്‍ ആഗ്രഹിക്കുന്നത് എന്ന് തിരിച്ചറിഞ്ഞ് തിരിച്ചടിക്കാന്‍ കോണ്‍ഗ്രസിന്റെ മുതിര്‍ന്ന നേതാക്കള്‍ക്ക് കഴിയേണ്ടതുണ്ട്.