ഗാസയില്‍ മരണസംഖ്യ 500 കടന്നു; വെടിനിറുത്തലിന് യുഎന്‍ ആഹ്വാനം

ഗാസ: ഗാസയില്‍ ഇസ്രായേല്‍ കൂട്ടക്കൊല തുടരവെ അടിയന്തര വെടിനിര്‍ത്തലിന് യു.എന്‍ രക്ഷാസമിതിയുടെ ആഹ്വാനം ചെയ്തു. ഗാസയിലേക്ക് ഇസ്രായേല്‍ നടത്തുന്ന ഷെല്ലാക്രമണം അതിനിഷ്ഠൂര പ്രവൃത്തിയാണെന്നും യു.എന്‍ സെക്രട്ടറി ജനറല്‍ ബാന്‍ കി മൂണ്‍ പ്രതികരിച്ചു. ഗാസ വിഷയത്തില്‍ ഐക്യരാഷ്ട്ര സഭയുടെ അടിയന്തര യോഗത്തിനു ശേഷം പ്രതികരിക്കുകയായിരുന്നു മൂണ്‍. അതേസമയം, ഗാസയില്‍ ഇസ്രായേല്‍ ആക്രമണം തുടരുകയാണ്. ഇതിനകം മരണസംഖ്യ 502 ആയി. 3,135 പേര്‍ക്ക് പരുക്കേറ്റതായും ഗാസ ആമരാഗ്യ മന്ത്രാലയം വ്യക്തമാക്കി. രണ്ടാഴ്ചയായി തുടരുന്ന ആക്രമണത്തില്‍ ഇന്നലെയാണ് ഏറ്റവും ശക്തമായ ആക്രമണം നടന്നത്. ഇന്നലെ 13 ഇസ്രായേല്‍ സൈനികരടക്കം നൂറിലേറെ പേര്‍ കൊല്ലപ്പെട്ടു. ഒരു ഇസ്രായേലി സൈനികനെ ഹമാസ് തടവിലാക്കിയതായും റിപ്പോര്‍ട്ടുണ്ട്. എന്നാല്‍ ഇക്കാര്യം ഇസ്രായേലിന്റെ യു.എന്‍ അംബാസഡര്‍ റോണ്‍ പ്രോസര്‍ നിഷേധിച്ചു. തിങ്കളാഴ്ച 20 പലസ്തീന്‍ പൗരന്മാരാണ് കൊല്ലപ്പെട്ടത്. ഇവരില്‍ ഒരു കുടുംബത്തിലെ ഏഴ് കുട്ടികളടക്കം ഒന്‍പതുപേരും ഉള്‍പ്പെടുന്നു. യു.എന്‍ കണക്ക് അനുസരിച്ച് 83,695 പേര്‍ ഗാസയില്‍ നിന്ന് പലായനം ചെയ്തു. വെടിനിര്‍ത്തല്‍ ചര്‍ച്ചകള്‍ക്കായി യു.എസ് സ്‌റ്റേറ്റ് സെക്രട്ടറി ജോണ്‍ കെറി തിങ്കളാഴ്ച കെയ്‌റോവിലെത്തും. പ്രസിഡന്റ് ബരാക് ഒബാമ ഇസ്രയേലി പ്രധാനമന്ത്രി ബെഞ്ചമിന്‍ നെതന്യാഹുവുമായി ടെലിഫോണില്‍ ചര്‍ച്ച നടത്തി.