“മലിനമായ ജലാശയം അതിമലിനമായൊരു ഭൂമിയും….” ഇന്ന് ലോക പരിസ്ഥിതി ദിനം…!

വേഴാമ്പലിനെ പോലെ മഴയ്ക്കായി നാളുകളുടെ കാത്തിരിപ്പായിരുന്നു. ഇപ്പോള്‍ മനസ്സിനും ശരീരത്തിനും കുളിരേകി മഴ തകര്‍ത്തു പെയ്യുന്നു. പ്രകൃതിയും മനുഷ്യനും ഒരുപോലെ സന്തോഷിക്കുന്ന നിമിഷം. പക്ഷെ മനുഷ്യന്റെ പ്രവര്‍ത്തി ദോഷംകൊണ്ട് പ്രകൃതി നാള്‍ക്കുനാള്‍ മരിച്ചുകൊണ്ടിരിക്കുകയാണ്. പ്രകൃതി ഇല്ലെങ്കില്‍ മനുഷ്യനും ഇല്ല എന്ന സത്യം മനുഷ്യന്‍ മനസ്സിലാക്കുവാന്‍ വൈകിപ്പോയി. അതിന്റെ ദോഷങ്ങള്‍ മനുഷ്യര്‍ അനുഭവിക്കുന്നുമുണ്ട്.

നഷ്ടപ്പെടുന്ന പച്ചപ്പിനേയും ഇല്ലാതാകുന്ന ആവാസ വ്യവസ്ഥകളേയും ഓര്‍മ്മിപ്പിച്ചു കൊണ്ട് ഇന്ന് ലോക പരിസ്ഥിതി ദിനം. വൃക്ഷങ്ങള്‍ ഇല്ലാതാകുന്നതും പുഴകളും തോടുകളും ഇല്ലാതാകുന്നതും മനുഷ്യന്‌റെ കടന്നുകയറ്റങ്ങള്‍ കൊണ്ടാണെന്നത് ഒരിക്കല്‍ക്കൂടി ലോകത്തെ ഓര്‍മ്മപ്പെടുത്തുകയാണ് ഈ ദിനം. ഇനി വരുന്നൊരു തലമുറയ്ക്ക് ഇവിടെ വാസം സാധ്യമോ...? എത്ര അര്‍ത്ഥവത്തായ വരികള്‍. നമ്മുടെ തലമുറയ്ക്കുവേണ്ടിയയെങ്കിലും നമ്മള്‍ പ്രകൃതിയെ സംരക്ഷിക്കേണ്ടിയിരിക്കുന്നു.

കാലാവസ്ഥാ വ്യതിയാനം ചെറുക്കാനുള്ള ആഹ്വാനമാണ് ഇത്തവണത്തെ പരിസ്ഥിതി ദിനത്തിന്‌റെ സന്ദേശം. കാലാവസ്ഥാ മാറ്റത്തെ കുറിച്ച് ശക്തമായ മുന്നറിയിപ്പാണ് ലോകബാങ്ക് നല്‍കുന്നത്. കാലാവസ്ഥാ മാറ്റം ലോകഗതിയെ തന്നെ മാറ്റിമറിക്കുന്നതാണെന്നാണ് ലോകബാങ്ക് നടത്തിയ പഠനത്തില്‍ പറയുന്നു. ഹരിത കേരളം പദ്ധതിയുടെ ഭാഗമായി പരിസ്ഥിതി ദിനത്തിൽ ഒരു കോടി വൃക്ഷത്തൈകളാണ് ഇന്ന് നടുന്നത്. പരിസ്ഥിതി ദിനാഘോഷത്തിന്റെ സംസ്ഥാനതല ഉദ്ഘാടനം ജൂൺ 5 തിങ്കളാഴ്ച രാവിലെ 10:30ന് കനകക്കുന്നിൽ വൃക്ഷത്തൈ നട്ട് ഗവർണർ പി സദാശിവം നിർവഹിക്കും. ഹരിതം സഹകരണം, മഴക്കൊയ്ത്തുത്സവം, നന്മമരം, ഓണത്തിന് ഒരു മുറം പച്ചക്കറി തുടങ്ങിയ പദ്ധതികളുടെ സംസ്ഥാനതല ഉദ്ഘാടനവും പരിസ്ഥിതിദിനത്തില്‍ നടക്കും.