സ്വാമിയുടെ ലിംഗം ഛേദിക്കപ്പെട്ട കേസ് ആന്റി ക്ലൈമാക്‌സിലേക്ക്…!

യുവതിയുടെ ആക്രമണത്തില്‍ സ്വാമിയുടെ ലിംഗം ഛേദിക്കപ്പെട്ട കേസ് ആന്റി ക്ലൈമാക്‌സിലേക്ക്. ഉറങ്ങികിടന്ന സ്വാമിയെ ആക്രമിച്ച് ലിംഗം ഛേദിച്ചത് കാമുകനാണെന്നാണ് പുതിയ റിപ്പോര്‍ട്ട്. പീഡനശ്രമത്തിനിടെ സ്വാമിയുടെ ലിംഗം ഛേദിക്കുകയായിരുന്നുവെന്നാണ് പെണ്‍കുട്ടി പൊലീസിന് മൊഴിനല്‍കിയത്. എന്നാല്‍ സംഭവത്തില്‍ ആദ്യം മുതലേ പെണ്‍കുട്ടിയുടെയും അമ്മയുടെയും മൊഴികള്‍ പൊലീസിനെ കുഴക്കിയിരുന്നു.

പെണ്‍കുട്ടിയുടെ വീട്ടില്‍ ഏഴ് വര്‍ഷമായി സ്വാമി നിത്യസന്ദര്‍ശകനാണ്. പെണ്‍കുട്ടിയുമായി സ്വാമി പലയിടത്തും യാത്രകളും പോയിട്ടുണ്ട്. പെണ്‍കുട്ടിയുടെ അമ്മയുമായി സ്വാമിക്കുണ്ടായിരുന്ന ബന്ധം പെണ്‍കുട്ടിക്ക് ഉള്‍ക്കൊള്ളാന്‍ കഴിഞ്ഞിരുന്നില്ല. കുറച്ച് കാലമായി പെണ്‍കുട്ടിക്ക് മെഡിക്കല്‍ റപ്പായ യുവാവുമായി അടുപ്പം ഉണ്ടായിരുന്നു. ഈ ബന്ധം ഉടലെടുത്തതിനുശേഷം പെണ്‍കുട്ടിക്ക് അമ്മയും സ്വാമിയുമായി അത്ര അടുപ്പം ഉണ്ടായിരുന്നില്ല. എങ്കിലും അമ്മയും സ്വാമിയുമായുള്ള ബന്ധം തുടര്‍ന്നുപോന്നു. ഇതിനിടയില്‍ പെണ്‍കുട്ടിയുടെ കാമുകനായ മെഡിക്കല്‍ റപ്പ് രാത്രികാലങ്ങളില്‍ പെണ്‍കുട്ടിയെ തേടി വീട്ടിലെത്തുന്നത് പതിവായി. ഇതിനെ എതിര്‍ത്ത സ്വാമിയോടും അമ്മയോടും പെണ്‍കുട്ടി വഴക്കിടുക പതിവായിരുന്നു. തുടര്‍ന്ന് സ്വാമിയെ അപായപ്പെടുത്തുവാന്‍ പെണ്‍കുട്ടിയും കാമുകനും തീരുമാനിക്കുകയായിരുന്നു.

സംഭവം നടന്ന വെള്ളിയാഴ്ച രാത്രി കാമുകനും സുഹൃത്തും പെണ്‍കുട്ടിയുടെ നിര്‍ദ്ദേശപ്രകാരം വീട്ടിലെത്തുകയായിരുന്നു. തുടര്‍ന്ന് ഉറങ്ങിക്കിടന്ന സ്വാമിയെ സുഹൃത്തിന്റെ സഹായത്തോടെ കാമുകന്‍ ലിംഗം മുറിച്ച് മാറ്റുകയായിരുന്നു. സംഭവത്തിന് ശേഷം കാമുകന്റെ കൈയില്‍ നിന്നും കത്തി വാങ്ങി പെണ്‍കുട്ടി പുറത്തേക്ക് ഓടുകയായിരുന്നു. ഈ സമയത്ത് കാമുകനും സുഹൃത്തും പിന്‍വാതിലിലൂടെ രക്ഷപ്പെടുകയും ചെയ്തു.

യുവതിക്കെതിരേ മാതാവും സഹോദരനും ഇപ്പോള്‍ രംഗത്ത് വന്നിരിക്കുകയാണ്‌. കാമുകനുമായുള്ള ബന്ധത്തില്‍നിന്നും പിന്തിരിയണമെന്ന ആവശ്യത്തെ തുടര്‍ന്നാണു യുവതി ഇത്തരത്തില്‍ പ്രവര്‍ത്തിച്ചതെന്നു വനിതാ കമ്മിഷനും സംസ്ഥാന പോലീസ് മേധാവിക്കും നല്‍കിയ പരാതിയില്‍ മാതാവും സഹോദരനും വ്യക്തമാക്കി. മകളെ സ്വാമി ലൈംഗികമായി ഉപദ്രവിച്ചിട്ടില്ലെന്നും ഇവര്‍ വ്യക്തമാക്കുന്നു.

തങ്ങളുടെ കുടുംബവുമായി വര്‍ഷങ്ങള്‍ നീണ്ട ബന്ധമാണു സ്വാമിക്കുള്ളത്. മകളെ ഒരിക്കലും സ്വാമി ലൈംഗികമായി ഉപദ്രവിച്ചിട്ടില്ല. തിരുവനന്തപുരത്ത് എത്തുമ്പോള്‍ സ്വാമി തങ്ങളുടെ വീട്ടിലാണു താമസിച്ചിരുന്നത്. കാമുകനുമായുള്ള ബന്ധം ഉപേക്ഷിക്കണമെന്ന് ആവശ്യപ്പെട്ടതാണു മകള്‍ക്കു സ്വാമിയോട് ശത്രുതയുണ്ടാകാന്‍ കാരണം. സ്വാമി പിണങ്ങരുതെന്നും തനിക്ക് സ്വാമിയോട് അകല്‍ച്ചയില്ലെന്നും പറഞ്ഞാണു പെണ്‍കുട്ടി സ്വാമിയെ വിളിച്ചുവരുത്തിയത്. സംഭവം ഉണ്ടായ ദിവസം രാവിലെ പത്ത് മണിക്കു പുറത്തുപോയ മകള്‍ വൈകിട്ട് ആറരക്കാണു വീട്ടില്‍ തിരിച്ചെത്തിയത്. അന്നു രാത്രിയില്‍ സ്വാമി ഹാളിലാണു കിടന്നിരുന്നത്.

പാലും പഴങ്ങളും നല്‍കി താന്‍ മുറിയിലേക്കു പോയപ്പോഴാണു ബഹളം കേട്ടത്. മകള്‍ പുറത്തേക്ക് ഓടുന്നതും സ്വാമി ജനനേന്ദ്രിയം അറ്റനിലയില്‍ രക്തത്തില്‍ കുളിച്ചു കിടക്കുന്നതുമാണു കണ്ടെതെന്നു മാതാവ് നല്‍കിയ പരാതിയിലുണ്ട്. മകളുടെ മുറിയിലോ വീട്ടിന്റെ മറ്റേതിങ്കിലും ഭാഗത്തോ സ്വാമി പോയിട്ടില്ല. മകളുടെ കാമുകന്‍ തങ്ങളുടെ പക്കല്‍ നിന്നും 6.6 ലക്ഷം രൂപ വാങ്ങിയിട്ടുണ്ട്. കൂടാതെ ഭൂമി വാങ്ങുന്നതിനായി ഒന്‍പത് ലക്ഷവും നല്‍കി. അതിനാല്‍ സംഭവത്തില്‍ കാമുകനും പങ്കുണ്ടെന്നു പരാതിയില്‍ പറയുന്നു.

സംഭവത്തിനുശേഷം ഒരു ഉന്നത പോലീസ് ഉദ്യോഗസ്ഥന്റെ വീട്ടിലേക്കാണു മകള്‍ ഓടിക്കയറിയത്. എന്നാല്‍ തങ്ങളെ പോലീസ് സ്‌റ്റേഷനില്‍ വിളിച്ചു സ്വാമി മകളെ ബലാല്‍സംഗം ചെയ്‌തെന്നും 40 ലക്ഷം രൂപ വാങ്ങിയെന്നു മൊഴി നല്‍കണമെന്നു നിര്‍ബന്ധിച്ചതായും സംസ്ഥാന പോലിസ് മേധാവിക്കും വനിതാ കമ്മിഷനും നല്‍കിയ പരാതിയില്‍ പറയുന്നു.

യുവതിയുടെ കാമുകന്‍ ഇപ്പോള്‍ ഒളിവിലാണ് . ഇയാള്‍ക്കായുള്ള അന്വേഷണം പൊലീസ് ഊര്‍ജ്ജിതമാക്കിയിരിക്കുകയാണ്.