ഉമ്മന്‍ചാണ്ടിയുടെ മൂന്നാര്‍ ഇടപെടലിന് പിന്നില്‍ പഴയ കെ.എസ്.യു തന്ത്രമോ…?

എം എം മണി വിഷയത്തില്‍ യു ഡി എഫിലെ മറ്റ് നേതാക്കളെയും ഇടതുമുന്നണിയെയും ബി ജെ പിയെയും എല്ലാം അമ്പരപ്പിച്ചുകൊണ്ടായിരുന്നു ഉമ്മന്‍‌ചാണ്ടിയുടെ എന്‍ട്രി. 'പെമ്പിളൈ ഒരുമൈ’യുടെ സമരം യു ഡി എഫ് ഏറ്റെടുക്കുകയാണെന്ന് ഉമ്മന്‍‌ചാണ്ടി പരസ്യമായി പ്രഖ്യാപിക്കുമ്പോള്‍ അതിന് പിന്നില്‍ പഴയ ഒരു ചാണക്യ തന്ത്രം ഒളിഞ്ഞ് ഇരിക്കുന്നില്ലെ എന്നൊരു സംശയം.

ഇനിയിപ്പോള്‍ ആ പഴയ ചാണക്യ തന്ത്രം എന്താണെന്ന് ഒന്ന് പരിശോധിക്കാം. യുഡിഎഫ് സമരങ്ങള്‍ മിക്കവാറുമൊക്കെ താരതമ്യം ചെയ്യുന്നത് പഴയ കെഎസ്.യു സമരവുമായി ബന്ധപ്പെടുത്തിയാണ്. അപ്പോള്‍ ഒരു സംശയം തോന്നാം എന്താണ് ഈ കെ.എസ്.യു സമരം എന്ന്. ഈ പറഞ്ഞ കെ.എസ്.യു സമരങ്ങള്‍ക്ക് വര്‍ഷങ്ങളുടെ പഴക്കമുണ്ട്. നമ്മുടെ ഇപ്പോഴത്തെ വീരനായകന്‍ ഉമ്മന്‍ചാണ്ടിയും തിരുവഞ്ചൂര്‍ രാധാകൃഷ്ണനുമൊക്കെ രാഷ്ട്രീയ കളരിയില്‍ ആദ്യാക്ഷരം കുറിച്ച നാള്‍ മുതല്‍ തുടങ്ങിയ ചരിത്രപ്രസിദ്ധമായ കഥ.

'കെ.എസ്.യുകാര്‍ ഒരു സമരം അങ്ങ് പ്രഖ്യാപിക്കും. പിന്നെ അടിയായി സംഘര്‍ഷമായി ആകെ ഒരു ബഹളമാണ്. പിന്നീട് സംഘര്‍ഷം നിറഞ്ഞ ഭൂമിയിലേക്ക് പൊലീസും എത്തുന്നതോടെ സംഗതി ക്ലീന്‍. ആര്..? എന്തിന്..? എന്ന ചോദ്യമൊന്നും ഈ സംഘര്‍ഷത്തിന് മുന്നില്‍ ഉന്നയിക്കേണ്ട. കാരണം അതിന് വലിയ പ്രസക്തി ഒന്നും ഇല്ല. സ്വന്തം പാര്‍ട്ടിക്ക് പേരും പ്രശസ്തിയും നേടികൊടുക്കാന്‍ പാര്‍ട്ടിയോട് കൂറുള്ള പ്രവര്‍ത്തകന്‍ എന്തും ചെയ്യാന്‍ സന്നദ്ധനായിരിക്കണം. അപ്പോള്‍ സ്വന്തം സമരത്തിന് സ്വയം കല്ലെറിയുക, പരസ്പരം അക്രമിക്കുക, സ്വന്തം വസ്ത്രം വലിച്ച് കീറി പൊലീസിന് മുന്നില്‍ അക്രമരാഷ്ട്രീയത്തിന്റെ ഇരയാകുക. ഇതില്‍ കൂടുതല്‍ എന്താണ് ഒരു പ്രവര്‍ത്തകന്‍ ചെയ്യേണ്ടത്'. ഇപ്പോള്‍ മൂന്നാറില്‍ അരങ്ങേറിയ നാടകീയ സംഭവങ്ങള്‍ക്ക് പിന്നില്‍ ഒരു പഴയ കെ.എസ്.യു സമരം ഒളിപ്പിച്ച് ഉമ്മന്‍ചാണ്ടി എന്ന ചാണക്യന്‍ നടത്തുന്ന നാടകമാണോ ഇതെന്ന് സംശയിക്കേണ്ടിയിരിക്കുന്നു.

സമരപ്പന്തൽ പൊളിക്കാൻ സിപിഐ(എം) ശ്രമിച്ചുവെന്ന് പെമ്പിളൈ ഒരുമൈ നേതാവ് ഗോമതി പറഞ്ഞു. ആംആദ്മി പ്രവര്‍ത്തകര്‍ നിരാഹാരം നടത്തേണ്ടതില്ലെന്ന് പെമ്പിളൈ ഒരുമൈ നിര്‍ദ്ദേശിച്ചിരുന്നു. എന്നാൽ ഇതുമായി ബന്ധപ്പെട്ട് ആംആദ്മി പ്രവര്‍ത്തകരും പെമ്പിളൈ ഒരുമൈ പ്രവര്‍ത്തതകരും തമ്മില്‍ ചര്‍ച്ച നടത്തുന്നതിനിടെ ഒരു വിഭാഗം ആളുകളെത്തി പന്തല്‍ പൊളിച്ചുമാറ്റാന്‍ ശ്രമിക്കുകയായിരുന്നു. സത്യത്തില്‍ ഈ സമരപന്തല്‍ പൊളിച്ച് നീക്കിയത് കൊണ്ട് സിപിഐഎമ്മിന് എന്ത് നേട്ടമാണ്. അത്രയ്ക്ക് വകതിരിവ് ഇല്ലാത്തവരുടെ പാര്‍ട്ടിയാണോ സിപിഐഎം. എന്തായാലും സമരപന്തല്‍ പൊളിച്ചു. മണി ആശാന്റെ ഭാഷയില്‍ പറഞ്ഞാല്‍ കുളം കലങ്ങി. എന്നാല്‍ ഇനി മീന്‍ പിടിച്ചാലോ...? അതേ, അത് തന്നെ.. അല്ലെ സത്യം. കലക്കവെള്ളത്തില്‍ മീന്‍പിടിക്കാന്‍ വഞ്ചിയും വലയുമായി അവരിങ്ങ് എത്തുകയും ചെയ്തു. എന്തായാലും ഈ പ്രവര്‍ത്തികൊണ്ട് ഉമ്മന്‍ചാണ്ടിക്ക് രണ്ട് ഉണ്ട് കാര്യം.

പ്രാദേശിക യു ഡി എഫ് ഈ സമരത്തെ പിന്തുണയ്ക്കേണ്ടതില്ല എന്ന തീരുമാനം ഏടുത്തിരിക്കുന്ന സാഹചര്യത്തിലാണ് ഉമ്മന്‍‌ചാണ്ടി ഹീറോയിസം കാട്ടിയത് എന്നോര്‍ക്കണം. പാര്‍ട്ടിയിലോ മുന്നണിയിലോ ഒരു പദവിയും വേണ്ടെന്ന് തുറന്നുപറഞ്ഞാണ് ഉമ്മന്‍‌ചാണ്ടിയുടെ പ്രവര്‍ത്തനം. ഈയൊരു പ്രവര്‍ത്തിയിലൂടെ ഒരു പദവിയുമില്ലാത്ത ഉമ്മന്‍‌ചാണ്ടി ‘മുഖ്യമന്ത്രി ഉമ്മന്‍‌ചാണ്ടി’യെക്കാള്‍ കരുത്തനാണെന്ന് ഇപ്പോള്‍ തെളിഞ്ഞിരിക്കുകയാണ്.

കെ പി സി സി അധ്യക്ഷനോ പ്രതിപക്ഷനേതാവിനോ കിട്ടാത്ത സ്വീകാര്യതയാണ് ജനങ്ങളുടെ ഇടയില്‍ ഉമ്മന്‍‌ചാണ്ടിക്ക്. പെമ്പിളൈ ഒരുമൈയുമായി ഒരു ബന്ധവും വേണ്ടെന്നും എം എം മണിക്കെതിരെ യു ഡി എഫ് പ്രത്യേകമായി സമരം നയിച്ചാല്‍ മതിയെന്നുമായിരുന്നു യു ഡി എഫ് പ്രാദേശിക ഘടകത്തിന്‍റെ തീരുമാനം. ആ സാഹചര്യം നിലനില്‍ക്കെയാണ് പെമ്പിളൈ ഒരുമൈയുടെ സമരം ഏറ്റെടുക്കുന്നതായി ഉമ്മന്‍‌ചാണ്ടി പ്രഖ്യാപിച്ചത്.

ഈ പ്രഖ്യാപനത്തിലൂടെ താന്‍ കേരള രാഷ്ട്രീയത്തില്‍ നിറഞ്ഞുകളിക്കാന്‍ തീരുമാനിച്ചിരിക്കുകയാണെന്ന് പരോക്ഷമായി പ്രഖ്യാപിക്കുകയാണ് ഉമ്മന്‍‌ചാണ്ടി ചെയ്തിരിക്കുന്നത്. ഇത് രമേശ് ചെന്നിത്തലയുടെ ഉറക്കം കെടുത്തുമെന്ന് പറയാതെ തരമില്ല. കോണ്‍ഗ്രസ് അല്ലെങ്കില്‍ യു ഡി എഫ് എന്നുപറയുന്നത് കേരളത്തില്‍ ഉമ്മന്‍‌ചാണ്ടിയാണെന്ന് വീണ്ടും തെളിയിക്കുന്നതാണ്‌ കുഞ്ഞൂഞ്ഞിന്‍റെ മൂന്നാര്‍ പ്രകടനം.