പിണാറായി തകര്‍ത്തത് രണ്ടാം വിമോചന സമരനീക്കം

പി എസ് രാജേഷ്

പാപ്പാത്തിച്ചോലയില്‍ കുരുശുനീക്കിയ റവന്യൂ ഉദ്യോഗസ്ഥരെ പരസ്യമായി വിമര്‍ശിച്ച മുഖ്യമന്ത്രി തകര്‍ത്തത് ഒരു വിഭാഗം ക്രൈസ്തവ സഭാനേതാക്കളുടെ കൂട്ടുപിടിച്ച് സര്‍ക്കാരിനെതിരെ സമരം ചെയ്യാനുള്ള ഗൂഡനീക്കം.

കോണ്‍ഗ്രസ് നേതാക്കളുമായി അടുത്ത ബന്ധം പുലര്‍ത്തുന്ന ഉന്നത സഭാതലവന്റെ പിന്‍തുണയോടെയാണ് സര്‍ക്കാരിനെതിരായ നീക്കങ്ങള്‍ക്ക് തുടക്കമിടാന്‍ തീരുമാനിച്ചത്. കുരിശു സ്ഥാപിച്ചത് സഭയില്‍ നിന്ന് പുറത്താക്കപ്പെട്ടവരാണെങ്ക ിലും പരിശുദ്ധ രൂപത്തെ തകര്‍ത്ത രീതി ശരിയല്ലന്ന ആരോപണവുമായി രംഗത്തു വരാനാണ് ഇവര്‍ തീരുമാനിച്ചത്. ഇതിന് ഉതകുന്ന രീതിയില്‍ പത്രപ്രസ്താവനയും കൊച്ചിയില്‍ തയാറായിരുന്നു.

ഇക്കാര്യം ഇന്റലിജന്‍സ് വിഭാഗം കൃത്യമായി മുഖ്യമന്ത്രിയെ അറിയിച്ചതോടെയാണ് കോട്ടയത്ത് സി ഐ ടി യു വേദിയില്‍ ഉദ്യോഗസ്ഥര്‍ കൂടിയാലോചനകള്‍ നടത്തണമായിരുന്നു. കുരിശു തകര്‍ത്തത് ശരിയായില്ല എന്ന പരസ്യമായി അഭിപ്രായ പ്രകടനം നടത്തിയത്. ഇന്റലിജന്‍സ് കൂടാതെ സഭയുമായി അടുപ്പമുള്ള കേരളകോണ്‍ഗ്രസ് (ജനാധിപത്യം) ഉന്നതനും ഇത് സംബന്ധിച്ച് സി പി എം നേതാക്കളെ വിവരം അറിയിച്ചിരുന്നു.

പിണറായി പാര്‍ട്ടി സെക്രട്ടറിയായിരുന്ന സമയത്ത് നടത്തിയ നികൃഷ്ടജീവി പ്രയോഗം കൂടി ഉള്‍പ്പെടുത്തി പ്രശ്‌നത്തെ കത്തിക്കാനായിരുന്നു തീരുമാനം. ഇതോടെ ഇടുക്കിയിലെ കയ്യേറ്റം ഒഴിപ്പിക്കലും അവസാനിപ്പിക്കാന്‍ സാധിക്കുമെന്ന് ഇക്കൂട്ടര്‍ കണക്ക് കൂട്ടിയിരുന്നു. സ്വയം വിമര്‍ശനം ഏറ്റുവാങ്ങിക്കൊണ്ട് മുഖ്യമന്ത്രി നടത്തിയ പരസ്യമായ ഏറ്റുപറച്ചില്‍ പ്രക്ഷോഭങ്ങള്‍ക്ക് അരങ്ങ ഒരുക്കിയവരെ തകര്‍ത്തു കളഞ്ഞു.

ഇപ്പോള്‍ കേരളമൊട്ടകെ നടക്കുന്ന ബിവറേജസ് വിരുദ്ധസമരത്തിന്റെ മാതൃകയിലാണ് സമരം നടത്താന്‍ തീരുമാനിച്ചത്. കോണ്‍ഗ്രസിലെ ഉന്നത് നേതാവ്. പഴയ ഒരു യു ഡി എഫ് ഘടകക്ഷി നേതാവ് എന്നിവരാണ് ഇതിനു പിന്നില്‍ ഉണ്ടായിരുന്നത്.

കുരിശുതകര്‍ക്കുന്നത് എല്‍ഡിഎഫ് നയമാണോയെന്നു സര്‍ക്കാര്‍ വ്യക്തമാക്കണമെന്നു കെസിബിസി ഡപ്യൂട്ടി സെക്രട്ടറി ഡോ. വര്‍ഗീസ് വള്ളിക്കാട്ട് ആവശ്യപ്പെട്ടത് ഇതിന്റെ ഭാഗമായിരുന്നുവെന്നാണ് സര്‍ക്കാര്‍ വിലയിരുത്തല്‍. വള്ളിക്കാട്ടിന്റെ തുടര്‍ച്ചയായി രംഗത്ത് വരാന്‍ മറ്റു പലരും തീരുമാനിച്ചിരുന്നു.

ഭീതിപടര്‍ത്തി കുരിശുപൊളിച്ചുമാറ്റാന്‍ ശ്രമിച്ചത് അവിവേകമാണ്. ബാബറി മസ്ജിദ് സംഭവം ഓര്‍മപ്പെടുത്തുന്ന രീതിയിലാണു നടപടിയെന്നുമായിരുന്നുഡോ. വര്‍ഗീസ് വള്ളിക്കാട്ടിന്റെ ആരോപണം.

കുരിശ് ആയുധമാക്കി ഇടുക്കിയിലെ കയ്യേറ്റം ഒഴിപ്പിക്കല്‍ തടയാനുള്ള നീക്കത്തില്‍ സബ്കളക്ടറുടെ സംഘത്തിലെ ആര്‍ക്കെങ്കിലും മനസറിവുണ്ടോ എന്ന് പരിശോധിക്കണമെന്നും ഉണ്ടെങ്കില്‍ നടപടി സ്വീകരിക്കണമെന്നു സര്‍ക്കാര്‍ നിര്‍ദ്ദേശം നല്‍കിയിട്ടുണ്ട്.

കയ്യേറ്റം ഒഴപ്പിക്കലില്‍ ജനവികാരം ഇളക്കാനുള്ള അവസരം കൊടുക്കരുതെന്നും, കൃത്യമായ ലിസ്റ്റ് തയാറാക്കി വന്‍കിട കയ്യേറ്റങ്ങള്‍ മാത്രം ആദ്യം ഒഴിപ്പിക്കണമെന്നും കളക്ടറേറ്റില്‍ യോഗം നടത്തി തീരുമാനിച്ച ശേഷമാണ് പാപ്പാത്തിച്ചോലയിലേക്ക് സംഘത്തെ അയച്ചത്. ഷെഡുകള്‍ പൊളിച്ചു നീക്കുക എന്ന നിര്‍ദ്ദേശമായിരുന്നു ഇവര്‍ക്ക് നല്‍കിയിരുന്നതെന്നുമാണ് ഹെഡ് ലൈന്‍ കേരളയോട് ഇടുക്കിയിലെ മുതിര്‍ന്ന ഒരു ഉദ്യോഗസ്ഥര്‍ വ്യക്തമാക്കിയത്.

കുരിശു പൊളിച്ചതിനെ മുതലെടുക്കുന്നതിനായി ഒരു കൂട്ടം ആളുകള്‍ അവിടെ എത്തിച്ചേര്‍ന്നത് എങ്ങനെയെന്നും, സംഘര്‍ഷ സ്ഥിതിയുണ്ടന്ന് വരുത്തുന്നതിനായി പെട്ടന്ന് 144 പ്രഖ്യാപിച്ചത് എന്തിനാണന്നും ഇന്റലിജന്‍സ് അന്വേഷിക്കുന്നുണ്ട്. അതും കൂടി ലഭിച്ചാല്‍ ഒരു പക്ഷെ റവന്യൂ തലത്തില്‍ ഒരു ശുദ്ധികലശത്തിന് ഇടയുണ്ട്.

പാപ്പാത്തിച്ചോലയിലെ കുരിശ് നീക്കിയതിനെക്കുറിച്ചു ക്രൈസ്തവസഭകളില്‍ ഭിന്നാഭിപ്രായം. നടപടിയെ അനുകൂലിച്ചു യാക്കോബായ സഭയും സിറോ മലബാര്‍ സഭയും രംഗത്തുവന്നതാണ് സര്‍ക്കാരിന് ഇപ്പോള്‍ ആശ്വാസമായിരിക്കുന്നത്.