കുഞ്ഞാലിക്കുട്ടിക്ക് യു.ഡി.എഫ് കണ്‍വീനര്‍സ്ഥാനം

ഉണ്ണികൃഷ്ണന്‍

യു ഡി എഫ് കണ്‍വീനര്‍സ്ഥാനം കുഞ്ഞാലിക്കുട്ടിക്ക് നല്‍കാന്‍ നീക്കം . യു. ഡി എഫിനെ ശക്തിപ്പെടുത്താന്‍ ഉമ്മന്‍ചാണ്ടിയുടെ മനസറിവോടെയാണ് രഹസ്യനീക്കം തുടങ്ങിയിരിക്കുന്നത്. കെ.എം മാണിയെ മുന്നണിയില്‍ മടക്കി എത്തിക്കാന്‍ ഈ ഒറ്റക്കാര്യത്തിലൂടെ സാധിക്കുമെന്ന രീതിയിലാണ് ഇതു സംബന്ധിച്ച ചര്‍ച്ചകള്‍ക്ക് തുടക്കമിട്ടിരിക്കുന്നത്.

മുന്നണിയിലെ വല്ല്യേട്ടന്‍ പദവി ബലികഴിച്ചുകൊണ്ട് ബി ജെ. പിക്കെതിരായ രാഷ്ട്രീയ നീക്കങ്ങള്‍ക്ക് കരുത്തുപകരാനുള്ള ശ്രമത്തിന്റെ ഭാഗമായിട്ടാണ് പുതിയ ചര്‍ച്ചകള്‍ തുങ്ങിയിരിക്കുന്നത്. കെ. പി സി സി അദ്ധ്യക്ഷ പദവിയിലേക്ക് ഉമ്മന്‍ചാണ്ടി നീങ്ങുമ്പോള്‍ ലീഗ് അടക്കമുള്ളവരെ അടിച്ചുമാറ്റി എന്‍ ഡി എ യ്ക്ക് പുതിയ മുഖം കൊടുക്കാനുള്ള തന്ത്രമാണ് അമിത് ഷാ ഒരുക്കുന്നത്. അതിനെയും ഇൗ തീരുമാനത്തിലൂടെ മറികടക്കാന്‍ സാധിക്കുമെന്ന് ഉമ്മന്‍ചാണ്ടി കണക്കുകൂട്ടുന്നു.

നിലവിലെ രാഷ്ട്രീയ സാഹചര്യത്തില്‍ അടുത്ത ലോക്‌സഭാ തിരഞ്ഞെടുപ്പിനെ നേരിടുന്ന യു ഡി എഫ് സ്ഥാനാര്‍ത്ഥികളുടെ സാധ്യത തീരെ പരിതാപകരമാണന്ന് ഉമ്മന്‍ചാണ്ടിക്ക് അറിയാം. ഇപ്പോള്‍ കൈശമുള്ള സീറ്റുകള്‍ ഉറപ്പിച്ചു നിര്‍ത്തണമെങ്കില്‍ മാണിയും കുഞ്ഞാലിക്കുട്ടിയും ഒപ്പം വേണം. ദേശീയ രാഷ്ട്രീയത്തിലേക്ക് നീങ്ങുന്ന കുഞ്ഞാലിക്കുട്ടിക്ക് മുന്നില്‍ ബി ജെ. പി നീട്ടുന്ന സ്ഥാനങ്ങളെക്കുറിച്ച് നല്ല ബോധ്യമുള്ള നേതാവാണ് ഉമ്മന്‍ചാണ്ടി . അതിനാല്‍ കോണ്‍ഗ്രസ് ഹൈക്കമാന്റിന് മുന്നിലാവും ഇക്കാര്യം എ ഗ്രൂപ്പിലെ നേതാക്കള്‍ ഉന്നയിക്കുക. നീക്കം പാളിയാല്‍ കുഞ്ഞാലിക്കുട്ടി പുറത്തേക്കുള്ള യാത്രയ്ക്ക് വേഗം കൂട്ടുമെന്ന് മറ്റാരെക്കാളും നന്നായി അറിയാം കുഞ്ഞൂഞ്ഞിന് .

അതിനൊപ്പം രമേശ് ചെന്നിത്തലയ്‌ക്കോ, കോണ്‍ഗ്രസ് ഹൈക്കമാന്റിനോ ഈ നിര്‍ദ്ദേശത്തെ തള്ളിക്കളയാന്‍ ആവില്ല. കുഞ്ഞാലിക്കുട്ടിയുടെ മുന്നണിനേതൃത്വപദവി കര്‍ണ്ണാടക തിരഞ്ഞെടുപ്പില്‍ മുസ്‌ളീം വോട്ടുകള്‍ സ്വാധീനിക്കാനും ഇടയാക്കും. ദേശീയ തലത്തില്‍ ബി. ജെ. പി ക്ക് എതിരെ സെക്കുലര്‍ ബദലിന് ശ്രമിക്കുന്ന കോണ്‍ഗ്‌സ് നേതൃത്വത്തിന് കുഞ്ഞാലിക്കുട്ടിയെ ഉയര്‍ത്തിക്കാട്ടി ഉത്തരേന്ത്യയിലെ മുസ്‌ളീം വോട്ടുകള്‍ കൂടി നേടിയെടുക്കാന്‍ സാധിക്കുമെന്നും എ ഗ്രൂപ്പ് പറയുന്നു.