കാസര്‍കോഡ് മദ്രസാ അധ്യാപകന്‍ കൊല്ലപ്പെട്ട നിലയില്‍,പ്രദേശത്ത് ഇന്ന് ഹര്‍ത്താല്‍

കാസര്‍കോഡ് പഴയചൂരി മുസ്ലിം പള്ളിയ്ക്കു സമീപം പ്രവര്‍ത്തിക്കുന്ന മദ്രസയിലെ അധ്യാപകന്‍ മടിക്കേരി സ്വദേശി റിയാസ്(34) കഴുത്തറുത്ത് കൊല്ലപ്പെട്ട നിലയില്‍.പള്ളിയോടു ചേര്‍ന്നുള്ള മുറിയിലാണ് റിയാസിനെ മരിച്ച നിലയില്‍ കാണപ്പെട്ടത്. അര്‍ദ്ധരാത്രിയോടെയാണ്

സംഭവം നടന്നതെന്നാണ് വിവരം.കൊലപാതകം നടന്നെ മുറിക്കു സമീപമുള്ള മറ്റൊരു മുറിയില്‍ കിടന്നുറങ്ങിയിരുന്ന ഖത്തീബ് അബ്ദുല്‍ അസീസ് മുസ്ല്യാര്‍ നിലവിളി കേട്ട് ഉണര്‍ന്നപ്പോള്‍ പള്ളിയുടെ നേരേ കല്ലേറുണ്ടായി.തുടര്‍ന്ന് വാതില്‍ അകത്തു നിന്നു കുറ്റിയിട്ട ശേഷം മറ്റൊരു വാതിലിലൂടെ പള്ളിയില്‍ കടന്ന് മൈക്കില്‍ കൂടി നാട്ടുകാരേ വിവരം അറിയിക്കുകയായിരുന്നു.നാട്ടുകാര്‍ ഓടിയെത്തിയപ്പോഴാണ് കൊലപാതകം നടന്ന വിവരം അറിയുന്നത്.തുടര്‍ന്ന് പൊലീസിനെ വിവരം അറിയിച്ചു.

ഒന്‍പത് വര്‍ഷമായി മുഹയുദ്ദീന്‍ ജുമാമസ്ജിദിനോട് ചേര്‍ന്ന ഇസ്സത്തുല്‍ ഇസ്ലാം മദ്രസയില്‍ അധ്യാപകനായി ജോലി ചെയ്തുവരികയായിരുന്നു റിയാസ്. മൃതദേഹം വിദഗ്ധ പോസ്റ്റുമോര്‍ട്ടത്തിനായി പരിയാരം മെഡിക്കല്‍ കോളേജ് ആസ്പത്രിയിലേക്ക് കൊണ്ടുപോയി.

കൊലപാതകത്തില്‍ പ്രതിഷേധിച്ച് കാസര്‍കോട് മണ്ഡലത്തില്‍ ഇന്ന് രാവിലെ 6 മുതല്‍ വൈകിട്ട് 6 വരെ മുസ്ലിംലീഗ് കാസര്‍കോട് മണ്ഡലം കമ്മിറ്റി ഹര്‍ത്താല്‍ ആചരിക്കുകയാണ്.