പനീര്‍ശെല്‍വം ക്യാമ്പില്‍ ആഹ്ലാദം

അനധികൃത സ്വത്തു സമ്പാദനക്കേസില്‍ സുപ്രീം കോടതി വിധി ശശികലയ്‌ക്കെതിരയാതോടെ ഒ പനീര്‍ശെല്‍വത്തിന്റെ ക്യാമ്പില്‍ ആഹ്ലാദാരവം.ശശികലയ്ക്കും കൂട്ടര്‍ക്കും നാലുവര്‍ഷം തടവെന്ന വിധിയാണ് തമിഴകത്തിന്റെ കാവല്‍ മുഖ്യമന്ത്രി പനീര്‍ശെല്‍വത്തിന്റെ ക്യാമ്പിന് ആശ്വാസമായത്.

മുഖ്യമന്ത്രിയാകാന്‍ തിടുക്കം കാട്ടി കഴിഞ്ഞ ആഴ്ചയാണ് ശശികല ഒ പി എസിനെ നിര്‍ബന്ധിച്ച് രാജി വെപ്പിച്ചത്.എന്നാല്‍ മുഖ്യമന്ത്രിയായി സത്യപ്രതിജ്ഞ ചെയ്യാന്‍ ഗവര്‍ണര്‍ വിദ്യാസാഗര്‍ റാവു ശശികലയ്ക്ക് അനുമതി നല്‍കിയില്ല.അതോടെ തന്നെ നിര്‍ബന്ധിച്ച് രാജിവെപ്പിച്ചെന്നും മുഖ്യമന്ത്രിയായി തുടരാന്‍ അനുവദിക്കണമെന്ന നിലപാടുമായി പനീര്‍ശെല്‍വം ഗവര്‍ണറെ സമീപിച്ചു.തുടര്‍ന്ന് എ ഐ ഡി എം കെ ട്രഷറര്‍ സ്ഥാനത്തു നിന്നു കൂടി ശശികല ഒ പി എസിനെ പുറത്താക്കി.പിന്നീട് രാഷ്ട്രീയ നാടകങ്ങള്‍ക്കാണ് തമിഴ്‌നാട് സാക്ഷ്യം വഹിച്ചുകൊണ്ടിരിക്കുന്നത്.എം എല്‍ എ മാര്‍ തങ്ങള്‍ക്കൊപ്പമാണെന്ന് ഇരുപക്ഷവും വാദിച്ചു. ശശികല തനിക്കൊപ്പമുള്ള എം എല്‍ എമാരേ റിസോര്‍ട്ടില്‍ താമസിപ്പിക്കുകയും 130 എം എല്‍ എ മാരുടെ പിന്തുണ പ്രഖ്യാപിച്ച് ഗവര്‍ണര്‍ക്ക് കത്തു കൈമാറുകയും ചെയ്തു.എന്നാല്‍ ശശികല ക്യാമ്പില്‍ നിന്നു കൊഴിഞ്ഞു പോക്കു തുടര്‍ന്നുകൊണ്ടിരുന്നു.രാഷ്ട്രീയാനിശ്ചിതാവസ്ഥ കണക്കിലെടുത്ത് ഗവര്‍ണര്‍ അറ്റോര്‍ണി ജനറലിനോട് നിയമോപദേശം തേടിയിരുന്നു.സംസ്ഥാനത്തുടന്‍ സര്‍ക്കാരുണ്ടാക്കാനുള്ള നീക്കം നടത്താനാണ് എ ജി മുഗള്‍ റോത്തഗി ഗവര്‍ണറോട് ആവശ്യപ്പെട്ടത്.എന്നാല്‍ ശശികലയെ മുഖ്യമന്ത്രി സ്ഥാനത്തേക്ക് ക്ഷണിക്കാന്‍ അദ്ദേഹം ആവശ്യപ്പെട്ടില്ല.

എന്നാല്‍ ഇതിനെല്ലാം ഉത്തരമുണ്ടാക്കിയാണ് അനധികൃത സ്വത്തു സമ്പാദന കേസില്‍ ശശികലയ്‌ക്കെതിരായ വിധി ഇന്നു സുപ്രീം കോടതി പറഞ്ഞിരിക്കുന്നത്.ഇതോടെ ഒ പി എസ് ക്യാമ്പ് സന്തോഷത്തിലാണ്.പക്ഷെ ശശികല ക്യാമ്പില്‍ നിന്നു മറ്റാരെയെങ്കിലും മുഖ്യമന്ത്രിയാക്കാനുള്ള നീക്കം നടത്താനും സാധ്യതയുണ്ട്.എന്നാല്‍ ശശികലയുടെ കീഴില്‍ തുടരാന്‍ എത്ര എം എല്‍ എ മാര്‍ ഉണ്ടാകുമെന്ന് കാത്തിരിക്കേണ്ടി വരും