അശ്ലീല മെസ്സേജ് : പരാതിയെത്തുടര്‍ന്ന് മുളന്തുരുത്തിയില്‍ വൈദികനെ പുറത്താക്കി

സ്വന്തം ഇടവക്കാരിയായ യുവതിക്ക് അശ്ലീല മെസ്സേജ് അയച്ച വൈദികനെ പരാതിയെത്തുടര്‍ന്ന് സഭാധികൃതര്‍ ചുമതലകളില്‍ നിന്നും ഒഴിവാക്കി. മുളന്തുരുത്തിയിലെ ദേവാലയത്തില്‍ സഹവികാരിയായി സേവനമനുഷ്ടിരുന്ന ആരക്കുന്നം സ്വദേശിയായ വൈദികനാണ് കൈയിലിരിപ്പിന്റെ പേരില്‍ പുറത്താക്കല്‍ നടപടി നേരിടേണ്ടി വന്നത്. വിവാഹിതനും ഒരു കുട്ടിയുടെ പിതാവുമായ വൈദികന്‍ യുവതിയുടെ മൊബൈലിലേക്ക് നിരന്തരം അശ്ലീല ചിത്രങ്ങളും മെസ്സേജുകളും അയയ്ക്കുക പതിവായിരുന്നു. പക്ഷെ, കഴിഞ്ഞ ദിവസം മെസ്സേജ് അയച്ചപ്പോള്‍ ഫോണ്‍ യുവതിയുടെ ഭര്‍ത്താവിന്റെ കൈയിലായിരുന്നു. ചിത്രങ്ങളും മെസ്സേജുകളും കണ്ട് കലിപൂണ്ട ഭര്‍ത്താവ് പള്ളിയിലെത്തി വൈദികനെ വിളിച്ചിറക്കി തെറിയഭിഷേകം നടത്തി എന്നാണ് വിവരം. സംഭവം കൈവിട്ടുപോകുമെന്ന് മനസ്സിലാക്കിയ മറ്റ് വൈദികര്‍ ഇടപെട്ട് രംഗം ശാന്തമാക്കുകയായിരുന്നു. കുറ്റക്കാരനായ വൈദികനെതിരെ നടപടി സ്വീകരിക്കാമെന്ന ഉറപ്പില്‍ യുവതിയുടെ ഭര്‍ത്താവ് പിന്‍വാങ്ങുകയുമായിരുന്നു. പിന്നീട് ഇയാള്‍ തെളിവ് സഹിതം പള്ളിക്കമ്മറ്റിക്ക് പരാതി നല്‍കുകയും ഇതിന്റെ അടിസ്ഥാനത്തില്‍ ആരോപണവിധേയനായ സഹവികാരിയെ സഭാനേതൃത്വം ചുമതലകളില്‍ നിന്നും മാറ്റുകയുമായിരുന്നു. പകരമായി വടവുകോട് പള്ളിയിലെ വൈദികനെ മുളന്തുരുത്തിയിലേക്ക് നിയമിക്കുകയും ചെയ്തു. വാട്‌സ് ആപ്പ് ഗ്രൂപ്പുകളില്‍ സജീവമായിരുന്ന വൈദികന്‍ പ്രസംഗത്തിലും സഭാപരിപാലനത്തിലും ഏറെ തല്‍പ്പരനുമായിരുന്നു. അതുകൊണ്ടുതന്നെ മേലധികാരികള്‍ക്ക് ഈ വൈദികനെക്കുറിച്ച് നല്ല മതിപ്പും ആയിരുന്നു. വിവാഹിതനായ വൈദികനും ഭാര്യയും തമ്മില്‍ കുറച്ചുകാലമായി അതിരുവിട്ട ബന്ധം തുടരുന്നതായി ഭര്‍ത്താവിന് സംശയം ഉണ്ടായിരുന്നു. ഇതേത്തുടര്‍ന്ന് ഭാര്യയുടെ ഫോണ്‍ ഭര്‍ത്താവ് നിരീക്ഷിച്ച് വരികയായിരുന്നു. തുടര്‍ന്നാണ് വൈദികന്റെ വാട്‌സ് ആപ്പ് ചിത്രങ്ങള്‍ ഉള്‍പ്പടെ ഭര്‍ത്താവ് പൊക്കിയത്.